IGIHE.com > Amakuru > U Rwanda
Kurwanira umutungo kamere mu mugezi wa Satinsyi bikomeje kuba isibaniro

Kurwanira umutungo kamere mu mugezi wa Satinsyi bikomeje kuba isibaniro


Yanditswe kuya 25-05-2012 - Saa 11:17' na Olivier MUHIRWA na Dushimiyimana Oliver

Ba rwiyemezamirimo babiri batsindiye isoko ryo gukura amabuye n’umucanga mu Karere ka Ngororero ku mugezi wa Satinsyi bakomeje kurebana ay’ingwe mu gihe kumvikana kwabo bikomeje kunanirana.

Ku mugezi wa Satinsyi aho ni mu Karerere ka Ngororero, niho hava amabuye ndetse n’umucanga bikoreshwa mu bw’ubatsi bwo muri aka Karere ka Ngororero, ndetse no mu nkengero zako, gusa kuko ari umutungo wa Leta, aka Karere ka Ngororero, kashyizeho gahunda y’uko bagomba gucunga uwo mutungo, nibwo batanze isoko ry’uzajya abicunga maze agatanga imisoro ku Karere.

Abatsindiye iryo soko rero ni barwiyemezamirimo babiri, uwitwa Ntwari Patrick watsindi amabuye n’umucanga byo hakurya y’uyu mugezi n’undi witwa Umuhire Alphonsine (uzwi ku izina rya Mama Gentille) watsindiye isoko ryo gucukura amabuye n’umucanga byo hakuno y’uyu mugezi.

Kuwa mbere tariki ya 21 Gicurasi 2012, ibintu byaje kuba ibindi ubwo hagati y’aba ba rwiyemezamirimo haje kuvukamo amakimbirane yaturutse kukutumvikana mu mikorere yabo, ibyo bikaba byaraturutse ngo kukuba ikiraro cyambukiranya uyu mugezi cyarasenywe n’amazi mu gihe cy’imvura imaze iminsi igwa, bityo uyu Ntwari Patrick ntabashe kubona uko yambuka ngo ajye gupakira umucanga n’amabuye bye hakurya y’uyu mugezi.

Ubwo Ntwari yajyaga gupakira rero nibwo yageze aho ku mugezi maze asaba abakozi ba Alphonsine ko bamuha amabuye ngo bari bakuye aho mu mugezi nuko arayapakira.

Ubwo twavuganana na Umuhire mu gitondo cyo kuri uyu wa gatanu yadutangarije ko iki kibazo gikomeye, yagize ati : « Iki kibazo kirimo ikintu cy’amashyari n’iterabwoba rikomeye, kuko ubwo uyu mugabo yari amaze gupakira nahamagaye ubuyobozi bumubuza kuzongera gupakira ariko nyuma y’aho nasubiyeyo ahubwo anteza abakozi be n’ibitiyo n’imihoro, mbega bashakaga kunjugunya mu ruzi, dore ko rwari rwanuzuye, kuva icyo gihe ikibazo kiracyahari kandi ushinzwe imisoro mu Karere arabizi ariko ntabwo ikibazo gikemurwa ».

Ikindi uyu mubyeyi yatangarije IGIHE, ni uko kuva icyo gihe atarongera gukora kandi amasezerano ye atararangira, akaba rero asaba ko ubuyobozi bwakwinjira mu kibazo buhereye mu mizi yacyo maze kigakemuka.

Umuhire Alphonsine agira ati : « Ukurikije ibyo akora afite inzego zimushyigikiye ntazi nawese batubujije kumena imicanga kuri kaburimbo ariko we abikora ku manywa kandi ntihagire umukurikirana, hari n’igihe nakopye umucanga umucuruzi witwa Dusabe ajya kwiyishyuriza avuga ko ari imodoka ze zayobye ».

Hari kandi umwe wo munzego z’ubuyobozi za polisi muri ako gace witwa Gilbert ushyirwa mu majwi kuba ngo atera ubwoba uwo mugore, ndetse kuri ubu akaba adashobora kuba yagera aho yari asanzwe acukura kuko hakunda kuba hari abapolisi, kandi ngo n’abakozi be bajya bafungwa ariko bagafungurwa nta dosiye bakorewe nk’uko yabidutangarije.

Ntwari Patrick aganira na IGIHE we yanyomoje ibivugwa n’uyu mu gore ko ntaho bihuriye n’ukuri, ariko ahamya koko ko yakoresheje abakozi ba Umuhire kugirango batunde umucanga wavaga aho akorera kuko ikiraro cyari cyacitse ariko ahakana ko atigeze akoresha umucanga we. Avuga kandi ko ibyo uyu mugore avuga byo kuba yaragiye kwishyuza aho atatanze umucanga hari habayeho kwibeshya, ariko ngo ikibazo cyaracyemutse.

Uyu mugabo kandi avugako uyu mugore bafitanye amakimbirane kuva cyera ariko akaba atarangira, ndetse ngo n’ubwo kuri uyu wa mbere ibi byabaga ngo Umuhire yaciye amafaranga ibihumbi icumi byari bigiye guhembwa abakozi be n’ubwo hari andi makuru dufite avuga ko aya mafaranga yaciwe ubwo umuvurungano w’abo bakozi b’abanyabiraka ba Patrick na Umuhire bayarwaniraga, kuko Umuhire we avuga ko ibyo by’amafaranga byabaye yahunze kuko bashakaga kumugirira nabi.

Ikindi Ntwari avuga ni uko nta tegeko na rimwe azi rimubuza komena umucanga cyabwga se amabuye ku muhanda wa kaburimbo kuva yatangira gukora aka kazi akaba ariyo mpamvu amena agendeye aho akazi gaherereye.

Tuganira n’umuyobozi w’Akarere ka Ngororero Ruboneza Gédeo mu gitondo cyo kuri uyu wa Gatanu, yatangarije IGIHE ko koko aba ba rwiyemeza mirimo bigeze kugirana ikibazo ariko kikaza gukemuka, iriko ibi bibazo byongeye kuvuka akaba atarabimenya ariko asaba Uyu Umuhire Alphonsine ko yamwegera ndetse na Ntwari yaba afite ikibazo akakimumenyesha akabikemura. Yagize ati : »Hari igihe abo wenda baba barazanyemo amarangamutima, ariko njye iyo mbimenye nJya aho byabereye nkabikemura nkabyirangiriza. »

N’ubwo Rwiyemezamirimo Ntwari avugako nta mabwiriza yo kutamena imicanga n’amabuye hafi y’umuhanda, Umuyobozi w’Akarere ka Ngororero Ruboneza, we siko abivuga, kuko avuga ko hashyizweho amabwiriza y’urwego rushinzwe kubungabunga ibidukikije yo kutamena imicanga cyangwa n’amabuye hafi y’umuhanda, ndetse ngo hari n’abaciwe amande. Ibi byose ngo biri mu rwego kubungabunga ibidukikije.

Nubwo hari amabwiriza abibuza amabuye akomeje kumenwa ku muhanda
Umucanga nawo uri mu byateye isibaniro

Foto:Dushimiyimana O.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO