IGIHE.com > Amakuru > U Rwanda
Kwakirana urugwiro abakugana bigomba kuba umuco-RDB

Kwakirana urugwiro abakugana bigomba kuba umuco-RDB


Yanditswe kuya 15-01-2013 - Saa 19:26' na Ange de la Victoire Dusabemungu

Ikigo cy’igihugu cy’iterambere (RDB) kibinyujije muri gahunda yiswe “Na Yombi” gikomeje gushishikariza abatanga serivisi kugira umuco wo kwakirana urugwiro ababagana kuko nta terambere ryagerwaho nta serivise zinoze.

Umwaka ushize wa 2012, RDB yari yateganyije ko ugomba kurangira byibuze igomba guhindura imyitwarire n’imyumvire y’abanyarwanda batanga serivise bagera kuri miliyoni binyuze mu butumwa butandukanye no guhugura abagera ku bihumbi bitanu bakamenya uburyo bwo gutanga serivi y’akarusho.

Ubwo kuri uyu wa kabiri tariki ya 15 Mutarama, 2012 iyi gahunda yakomerezaga mu karere ka Muhanga, abaturage baganiriye na IGIHE batangaje ko imitangire ya Serivisi igenda iba myiza .

Leonard Mugisha, ufite ubwenegihu bwa Uganda twahuye avuye kwaka serivisi ku Murenge wa Nyamabuye mu karere ka Muhanga, yadutangarije ko muri rusange serivisi zitangirwa mu Rwanda zimeze neza ariko cyane cyane akishimira ko bashyizeho ingamba zo kurwanya ruswa ahanini idindiza itangwa rya serivisi mu bindi bihugu byo mu karere.

Ati ”Kuba nta ruswa umuntu yakwa kugira ngo ahabwe serivise ni ikimenyetso kigaragara ko u Rwanda hari icyo rwagezeho ugereranyije n’ahandi. Mu bihe bizaza u Rwanda ruzaba ruhagaze neza mu gutanga serivisi”.

RDB ishishikariza abantu bose ko serivise nziza itera akanyamuneza abakugana bagahora baza

Ubusanzwe RDB yahawe inshingano zo kunoza imitangire ya serivisi mu Rwanda, nka bumwe mu buryo bwo guteza imbere abikorera ku giti cyabo

Alphonsine Iradukunda, nk’umwe mu bagize itsinda rya RDB rishinzwe gahunda zo kwakira abakiriya, yemeza ko uburyo bwo kwakira neza abakugana bikwiye kuba umuco w’Abanyarwanda, unahawe serivise akayihabwa agaragarizwa urugwiro.

Ati ”Ijambo “Murakoze” cyangwa se “Murakaza neza” si amagambo agoye kuyakoresha, ayo ni amagambo y’ikinyabupfura wagombye kugira akamenyero.”

Abana bakwiye gutozwa kwakirana ikinyabupfura bakiri bato
N'abagana insengero baba bagomba kubona serivisi zinoze
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO