IGIHE.com > Amakuru > U Rwanda
“Kwita ku mwana ni ukubaka umuryango we n’igihugu”

“Kwita ku mwana ni ukubaka umuryango we n’igihugu”


Yanditswe kuya 24-01-2013 - Saa 12:02' na Rene Anthere Rwanyange

Umuryango Hope and Homes for Children umaze gushyiraho ibigo 7 bishinzwe guteza imbere uburenganzira bw’umwana n’umuryango (Community hubs) mu turere twa Kicukiro, Bugesera na Nyamagabe. Imwe muri serivisi zitangirwa muri ibyo bigo ni ukwita ku bana bakomoka mu miryango ifite amikoro make, mu gihe ababyeyi babo baba bagiye gushaka imibereho.

Ubwo Hope and Homes for Children basuraga bamwe mu bakoresha biriya bigo batuye mu Mirenge ya Cyanika na Kamegeri yo mu karere ka Nyamagabe ku wa 22 Mutarama 2013, abo babyeyi batangaje ko amarerero yabafashije guha abana uburere bwiza.

Kime mu bigo byita ku burenganzira bw'umwana n'umuryango

Mukandutiye Esperance utuye mu kagari ka Bwama, mu Murenge wa Kamegeri, ashima Hope and Homes for Children yubatse irerero agira ati “Umwana wanjye ari mu barinyuzemo none ageze mu mashuri abanza. Yahakuye uburere bwiza, arangwa n’ikinyabupfura ndetse akunda kwiga ku buryo ubu ishuri yigamo aba uwa mbere kandi buri gihe arenza amanota 90%.” Yanavuze ko we ubwe atari gushobora kumwitaho bitewe n’ubuzima bugoye yari arimo.

Habimfura Innocent, umukozi mu muryango Hope and Homes for Children yavuze ko iyo umubyeyi utishoboye azindutse ajya gushaka imibereho, umwana yitabwaho na bene aya marerero, uburenganzira bwe bukabungabungwa aho arindwa ihohoterwa, kutitabwaho n’igikomeye kuba umubyeyi ashobora gutandukana n’umwana we.

Akomeza avuga ko igitekerezo cyo gushinga ayo marerero cyaturutse mu isesengura ry’imibereho y’abana bataruzuza imyaka yo gutangira ishuri, ndetse n’ibiganiro bagiranye n’abaturage n’abayobozi ; aho basanga mu duce tumwe na tumwe abo bana bakeneye kwitabwaho mu buryo bw’umwihariko.

Agaragaza ko ayo marerero yagize impinduka zigaragara mu mibereho myiza y’abana n’imiryango yabo. Agira ati “Kwita ku mwana ni ukwita ku muryango we, ni ukubaka none n’ejo heza h’igihugu.”

Urimubenshi Jean de Dieu, umukozi w’akagari ka Bwama ushinzwe ubukungu n’imibereho myiza y’abaturage yavuze ko iryo rerero ryakemuye ibibazo byinshi. Ngo hari ababyeyi basigaga abana bato mu ngo bakajya guhinga cyangwa gukora indi mirimo ntibamenye uko biriwe. Yagize ati “Byarashobokaga ko abo bana basigaye bonyine mu ngo bahohoterwa kandi iyo bibayeho natwe nk’abayobozi turabibazwa. Ikindi ni uko bamwe muri bo barwara bwaki n’izindi ndwara zituruka ku mirire mibi no kutitabwaho.”

Mu karere ka Nyamagabe ikindi kigo nk’icyo kiri I Rugogwe mu kagari ka Karama, Umurenge wa Cyanika. Nk’uko bitangazwa na Hategekimana Augustin, Visi Perezida wa Komite icunga icyo kigo babinyujije mu nyigisho no mu bikorwa bahugura ababyeyi ku burenganzira bw’umwana, kwihangira imirimo ibyara inyungu bakora imishinga iciriritse, ubuhinzi bwa kijyambere, kubahugura mu mategeko mbonezamubano n’ibindi.

Hitimana Brigitte, umukozi mu muryango Hope and Homes for Children yavuze ko ubu ayo marerero yeguriwe ababyeyi ari na bo bayacunga bafatanyije n’abayobozi mu nzego z’ibanze, bituma babigira ibyabo bakabikurikirana.

Uretse ari mu karere ka Nyamagabe, Umuryango Hope and Homes for Children watangije andi mu mirenge ya Nyarugenge, Mwogo, Gashora na Nyamata ku bufatanye n’Akarere ka Bugesera. Mu karere ka Kicukiro hubatswe irerero Teta riri mu murenge wa Kanombe (Busanza), hatangiye kandi imirimo yo kubaka irerero n’inzu mberabyombi mu murenge wa Kigarama.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO