IGIHE.com > Amakuru > U Rwanda
Leon Mugesera ngo ntiyumvikanaga na Habyarimana

Leon Mugesera ngo ntiyumvikanaga na Habyarimana


Yanditswe kuya 22-01-2013 - Saa 13:14' na James Habimana

Urubanza rwa Leon Mugesera rukomeje kuburanishwa mu mizi, na we akomeje guhabwa urubuga rwo kwisobanura ku byasha ashinjwa n’ubushinjacyaha. Kuri uyu wa kabiri tariki ya 22 Mutarama, akaba yavuze ko atumvikanaga n’uwari Perezida w’u Rwanda Juvenal Habyarimana, kuko ngo yamwirukanye ku kazi.

Kuva saa mbiri n’igice za mugitondo ni bwo Urukiko Rukuru rwongeye guha Mugesera urubuga rwo kwisobanura ku byo aregwa. Nk’uko yabigenje ku munsi w’ejo yibanze kutanga bimwe mu bisobanuro by’amagambo avuga ko atumvikanaho n’ubushinjacyaha. Yafashe umwanya wo gusobanura ijambo ku rindi buri ryose arisobanura mu mizi.

Mu gutanga ibisobanuro, Mugesera ari kumwe n’umwunganira mu mategeko Me Rudakemwa, yikomye uwari Perezida w’u Rwanda Juvenal Habyarimana, avuga ko mu 1991 yamwirukanye ku kazi, ngo aza kugasubizwaho na Ngirumpatse Matayo, wari Minisitiri w’Itangazamakuru. Akomeza avuga ko n’imyanya yabonaga yayihabwaga n’abaturage binyuze mu matora, ngo ntiyashyirwagaho na Guverinoma.

Ku birebana n’ijambo Hutu Power, Mugesera avuga ko atari we warizanye ngo kuko atari mu Rwanda, ryashyizweho mu 1993 na Karamira Frodouard i Nyamirambo.

Ku birebana n’ijambo yavugiye muri Mitingi ku Kabaya mu 1992, Mugesera yisobanuye avuga ko yarivuze atazi ko indege yari itwaye Habyarimana izahanurwa. Akomeza avuga ko atari ryo ryatumye Jenoside iba.

Ikindi ni uko Mugesera yisobanura avuga ko uburyo ubushinjacyaha bufata amagambo, bituma ijambo rye rita ireme ryaryo.

Yisobanura ku birebana n’uko ishyaka rya MRND ryaba ryarabibye amacakubiri mu banyarwanda, yagize ati “Njye rwose siko mbibona kuko buri gihe wasangaga twe twari turirimo, twahoraga duharanira ko mu Rwanda haba umutuzo kuko nabaye no muri Canada igihe kirekire, bityo nari narabonye uburyo iyo hari ubumwe mu mashyaka, igihugu kigira umutekano.

Ku kirego kirebana no kuba hari amagambo amwe yavugiye kuri radiyo RTLM ifatwa nk’iyakoreshejwe mu guhamagarira Abahutu kwica Abatutsi, yagize ati “Ariko rwose abantu banyitirira iyi radiyo kandi ntayizi, njye nabwiwe ijambo RTLM maze kugera muri Canada kuko iyi radiyo yashinzwe mu 1993 naravuye mu Rwanda.”

Biteganyijwe ko urubanza rugomba gukomeza ejo tariki ya 23 Mutarama, hakomeza kumvwa uruhande rw’uregwa.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO