IGIHE.com > Amakuru > U Rwanda
Leta ntiyakuyeho kwinjiza abakozi bashya mu kazi muri iyi minsi-MIFOTRA

Leta ntiyakuyeho kwinjiza abakozi bashya mu kazi muri iyi minsi-MIFOTRA


Yanditswe kuya 15-01-2013 - Saa 07:20' na Izuba Rirashe

Mu gihe muri iyi minsi hari abavuga ko Leta yaba yarahagaritse gahunda yo kwinjiza abakozi bashya mu kazi, Umunyamabanga uhoraho muri Minisiteri y’Abakozi ba Leta n’Umurimo, Mulindwa Samuel, avuga ko itigeze iyihagarika, ngo kuko bazakomeza kureba aho abakozi bakenewe bakongerwa, aho biri ngombwa ko badakenewe bagabanywe.

Mu kiganiro Mulindwa Samuel yagiranye n’ikinyamakuru Izuba Rirashe ku wa 10 Mutarama 2013, yavuze ko hari igihe wasangaga mu bigo cyangwa mu nzego za Leta bishyiriraho abakozi uko biboneye n’igihe bishakiye, rimwe na rimwe ngo wagereranya ugasanga umusaruro batanga ntaho uhuriye n’abakozi bafite.

Mulindwa yavuze ko ubu barimo gukora isuzuma mu bigo no mu nzego zitandukanye za Leta ryatangiye mu Kuboza 2012 rikazageza muri Kamena 2013, bareba neza niba hari aho abakozi bakenewe ngo bongerwe, ahari benshi badakenewe bagabanywe.

Yagize ati “Ibi bizaca akajagari karangwaga mu itangwa ry’akazi, aho wasangaga rimwe na rimwe hatangwa akatari ngombwa”.

Umunyamabanga uhoraho muri Minisiteri y’Abakozi ba Leta n’Umurimo, Mulindwa Samuel

Abajijwe niba ibivugwa ko nta kazi Leta izongera gutanga muri uyu mwaka byaba bidaterwa n’uko hari zimwe mu nkunga ibihugu bimwe byateraga u Rwanda zahagaritswe, Mulindwa avuga ko ibyo ntaho bihuriye n’imishahara y’abakozi ba Leta kuko ngo ubusanzwe iva (imishahara) mu bushobozi bw’igihugu.

Ati ”Uretse n’u Rwanda, ku isi hose ntaho imishahara y’abakozi iva ku nkunga y’amahanga”.

Uretse imirimo n’inzego nshya zigenda zishyirwaho muri Leta, ubusanzwe habaho gutanga isoko ry’akazi mu gihe umukozi ahinduye akazi, agiye mu kiruhuko cy’izabukuru cyangwa se mu gihe asezerewe biturutse ku makosa yakoze mu kazi.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO