IGIHE.com > Amakuru > U Rwanda
Leta y’u Bufaransa yongeye gutungwa agatoki ku ihanurwa ry’indege ya Habyarimana

Leta y’u Bufaransa yongeye gutungwa agatoki ku ihanurwa ry’indege ya Habyarimana


Yanditswe kuya 10-01-2013 - Saa 17:01' na Ange de la Victoire Dusabemungu

Ikinyamakuru Libération cyo mu Bufaransa, ku wa gatatu tariki ya 9 Mutarama 2013, cyasohoye inkuru irimo ikimenyetso gishobora kugaragaza uruhare rwa Leta y’u Bufaransa ku ihanurwa ry’indege yari itwaye Habyarimana Juvenal wahoze ari Perezida w’u Rwanda.

Icyo kinyamakuru kivuga ko ubwo umucamanza w’umufaransa Marc Trévidic yakoraga icukumbura ku ihanurwa ry’iyo ndege, yavumbuye urupapuro rwemeza ko hari abasirikare b’abajandarume babiri, bakomoka mu gihugu cy’u Bufaransa, bapfiriye mu Rwanda muri Mata 1994, ariko nyuma biza kugaragara ko amakuru ari kuri urwo rupapuro ari amahimbano.

Abishwe ni umusirikare w’umujandarume witwa René Maier, wari kumwe na Alain Didot wiciwe hamwe n’umugore we Gilda Didot, bikaba bivugwa ko bishwe hagati y’itariki ya 12 na 13 Mata 1994, ariko ngo iby’urupfu rwabo bikaba bitarigeze bisobanuka kugeza iki gihe.

Uruhare rw’ubufaransa ni uruhe ?

Ikinyamakuru Libération kiribaza niba urupfu rw’abo bantu batatu, rutazabangamira ubushakashatsi bwa Trévidic, cyangwa se kitaba ikimenyetso kiganisha ku ruhare rwa Leta y’u Bufaransa mu ihanurwa ry’indege yari itwaye Habyarimana na Ntaryamira Cyprien wari Perezida w’u Burundi.

Abishwe bari bantu ki ?

Abo basirikare b’abajandarume bishwe, bari abajyanama mu bya Tekiniki, bakaba bari bashinzwe n’ibijyanye n’itumanaho “transmission radio” hagati ya Ambasade y’u Bufaransa n’igisirikare cy’u Rwanda.

None iyicwa ryabo rije rite ?

Umwanditsi w’iyi nkuru avuga ko bishoboka ko bazize ko baba barumvise ibiganiro byabaye hagati ya Ambasade y’u Bufaransa i Kigali n’ingabo zari iz’u Rwanda, mbere y’uko indege yarimo Habyarimana ihanurwa, bityo Leta y’u Bufaransa ikaba yarifuzaga ko amakuru ajyanye n’iby’iyo ndege atazagaragazwa.

Abasinye ku mpapuro z’abapfuye “certificat de décès” na bo barabajijwe

Ikinyamakuru Libération kivuga ko uwitwa Michel Thomas ari na we uvugwa ko yaba yarasinye “certificat de décès” za bariya basirikare, yabajijwe niba ari we koko arabihakana, yongeraho kandi ko muri icyo gihe nta kashi y’ubutegetsi yagiraga, nk’uko kuri urwo rupapuro bigaragara ko ari yo yakoreshejwe.

Igitangaje kandi ngo ni uko abo bavugwa ko bishwe baba barazize impanuka yatewe n’isasu « accidentel » dû à des « balles d’arme à feu ». Ahangaha umuntu yakwibaza uwarashe isasu ryahitanye abantu batatu, uwo ari we.

Kuri Libération iki ni ikimenyetso gifatika ko Leta y’u Bufaransa yagize uruhare mu ihanurwa ry’indege yari itwaye Habyarimana ryakurikiwe n’iyicwa ry’Abatutsi basaga miliyoni.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO