IGIHE.com > Amakuru > U Rwanda
USA: Haritegurwa urubanza rwa kabiri rwa Munyenyezi

USA: Haritegurwa urubanza rwa kabiri rwa Munyenyezi


Yanditswe kuya 22-01-2013 - Saa 14:01' na Emile Nsabimana

Abacamanza bo mu gihugu cya Leta Zunze Ubumwe za Amerika muri Leta ya New Hampshire, biteguye kongera kumva urubanza rw’umugore wo mu Mujyi wa Manchester ushinjwa kubeshya ku ruhare yagize muri Jenoside yakorewe Abatutsi muri Mata 1994.

Munyenyezi Beatrice ubu w’imyaka 43, ngo yabeshye ko nta ruhare yagize muri Jenoside kugira ngo abone ubwenegihugu bwa Amerika ariko ubushinjacyaha bumukurikiranyeho n’ibyaha byo gutegeka abicanyi gufata ku ngufu no kwica abatutsi n’abahutu batari bashyigikiye Jenoside yakorewe abatutsi mu Rwanda mu mwaka w’1994.

Ikinyamakuru Concord montitor dukesha iyi nkuru kivuga ko Ubushinjacyaha bushinja Munyenyezi kubeshya mu mpapuro yakoresheje yinjira mu Bwongereza mu 1995.

Izo mpapuro zagaragazaga ko nta ruhare yagize muri Jenoside, nyamara hari ibimenyetso byemeza ko yaba yarayigizemo uruhare.

Izi mpapuro zaje kumuhesha ubwenegihugu mu mwaka wa 2003, icyakora nyuma ubushinjacyaha bugaragaza ko yabeshye hatangira urubanza rwo kureba ukuri kwabyo.

Umwaka ushize wa 2012 warangiye urubanza rwe rusubitswe, kuko abacamanza batekerezaga ko abatangabuhamya batasobanukiwe n’ibibazo byose babajijwe n’abanyamategeko kubera ubusemuzi bwakoreshejwe.

Ubushinjacyaha bwanze kugira icyo buvuga ku mwanzuro wo kuva ku batangabuhamya b’Abanyarwanda bwari bwifashishije ku nshuro ya mbere ngo hakoreshwe ubundi buryo bw’imiburanishirize mu rubanza rwa kabiri ruzatangira ku ya kane Gashyantare 2013.

Umunyamategeko Mark Howard uvuga ko yabonye urutonde rw’abatangabuhamya rwakozwe n’abacamanza ku rubanza rutaha, avuga ko abenshi muri abo batangabuhamya ari bashya.

Muri abo batangabuhamya harimo abakatiwe ku byaha bya Jenoside birimo gusambanya abagore ku ngufu mbere yo kubica, no gukubita abantu kugeza bapfuye.

Nyuma y’uko mu rubanza hagaragariye urujijo rugasubikwa, ubucamanza bwanzuye ko Munyenyezi afungurwa akajya mu rugo ariko ubushinjacyaha butangaza ko butishimiye iki cyemezo.

Umucamanza yijeje ko ubushinjacyaha ko ubucamanza buzamukurikirana Munyenyezi kugeza ku rubanza rwe rwa kabiri.

Ibiro ntaramakuru by’Abanyamerika AP bivuga ko hari umwe mu baburanishije Munyenyezi bwa mbere wavuze ko nta n’umwe mu bari bagize inteko iburanisha wemeza ko Munyenyezi yagize uruhare muri Jenoside, ariko nanone 10 muri 12 bakemeza ko yabeshye mu nyandiko yakoresheje.

Umugabo wa Munyenyezi ari we Arsene Shalom Ntahobari kimwe na nyina (wa Ntahobari) bahamijwe ibyaha bya Jenoside n’Urukiko Mpuzamahanga Mpanabyaha Rwashyiriweho u Rwanda ICTR, akatirwa igifungo cya burundu mu mwaka wa 2011.

Abavuga ko Munyenyezi yaba yaragize uruhare muri Jenoside babishingira ku kuba abantu be ba hafi barakatiwe (umugabo we na nyirabukwe), bakavuga ko nta kabuza na we agomba kuba yaragize uruhare muri Jenoside yakorewe abatutsi mu Rwanda mu 1994 hagendewe ku myitwarire y’umugabo we na nyirabukwe.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO