IGIHE.com > Amakuru > U Rwanda
Manyagiro: Imiterere yaho ituma kuhageza amazi bitoroshye

Manyagiro: Imiterere yaho ituma kuhageza amazi bitoroshye


Yanditswe kuya 30-01-2013 - Saa 08:47' na James Habimana

Nyuma y’aho bamwe mu baturage batuye Umurenge wa Manyagiro mu karere ka Gicumbi batangarije ko babangamiwe n’ibura ry’amazi, ubuyobozi bw’aka karere bwo buratangaza ko ibi bavuga atari ukuri.

Umwe mu baturage utuye i Manyagiro yatangarije IGIHE ko bafite ikibazo cy’amazi, aho avuga ko hari umushinga umaze imyaka irenga icumi waraje kubaha amazi ariko kugeza ubu amaso akaba yaraheze mu kirere.

Yakomeje avuga ko iki kibazo cyabo atari icya vuba, kuko ngo mu mwaka wa 1983, na bwo haje Rwiyemezamirimo witwaga Nkezabera wari watsindiye kubaha amazi, ariko ntibikorwe, bityo akavuga ko n’ubu ikibazo kiracyakomeje.

Ibi byatumye IGIHE dushaka kumenya neza uko iki kibazo gihagaze, Umuyobozi w’akarere ka Gicumbi Alexandre Mvuyekure avuga ko iki kibazo kimaze gukemuka kuko ngo ubuyobozi bwagerageje guhangana na cyo.

Mvuyekure yavuze ko umuyoboro wa Manyagiro wari umaze igihe udakora, yongeraho ko kubera imiterere y’aka gace, bituma abatuye uwo murenge bigorana kubagezaho amazi kuko bafite umuyoboro uri hasi mu kabande kandi abaturage batuye mu mpinga y’umusozi, bityo bigatuma hakoreshwa imashini ziyazamura akenshi ngo usanga bitaramba.
Yakomeje agira ati “Mu mwaka ushize, iyi gahunda yo kuzana amazi twayeguriye Rwiyemezamirimo, bityo ubu hari moteri 2 zizana amazi muri Manyagiro.”

Gusa yavuze ko ikibazo cy’amazi kigaragara no murenge wa Cyumba, kubera ko bafite imiyoboro ishaje, ariko avuga ko ubuyobozi bw’akarere bwasabye abashinzwe amazi kureba uko ayo matiyo yasimbuzwa andi mashya.

Akarere ka Gicumbi kari ku kigero cyo hasi mu kugira amazi meza kuko ubu bari ku kigero cya 59%, ari na byo byatumye ubuyobozi bw’aka karere butangariza IGIHE ko bwashyize ingufu nyinshi mu gukora imiyoboro yari yarangiritse ku buryo buvuga ko mu mpera z’uyu mwaka wa 2013, ngo bazaba bageze ku kigero cya 75% ariko bisaba ingufu nyinshi.

Ifoto: Mvuyekure Alexandre, Umuyobozi w’Akarere ka Gicumbi. Ifoto yavuye kuri Internet

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO