IGIHE.com > Amakuru > U Rwanda
MINEDUC yongeye kurinda umuvundo ku banyeshuri bajya mu biruhuko

MINEDUC yongeye kurinda umuvundo ku banyeshuri bajya mu biruhuko


Yanditswe kuya 15-03-2013 - Saa 15:35' na Emmanuel Kanamugire

Nk’uko bisanzwe bigenda mu itangira ry’abanyeshuri no kujya mu biruhuko kwabo, Minisiteri y’Uburezi yashyize ahagaragara kuri uyu wa 15 Werurwe gahunda y’uko bazataha ku buryo bose bagera mu ngo nta muvundo mu gutega imodoka.

Abazabimburira abandi gutaha tariki ya 28 Werurwe ni abo mu bigo by’amashuri biherereye mu turere twa Nyanza, Ruhango, Huye mu Ntara y’Amajyepfo, Rusizi na Nyamasheke mu Ntara y’Iburengerazuba, Nyarugenge, Kicukiro na Gasabo mu Mujyi wa Kigali bazasubire ku ishuri ku itariki ya 19 Mata 2013.

Naho Uturere twa Gisagara, Kamonyi, Nyaruguru na Nyamagabe mu Ntara y’Amajyepfo, Karongi Rutsiro, Ngororero, Rubavu na Nyabihu mu Ntara y’Iburengerazuba bazataha tariki ya 29 Werurwe, bazasubire ku mashuri yabo tariki ya 20 Mata.

Ku tariki ya 30 Werurwe hazataha abo mu bigo byo mu Turere tw’Intara y’Amajyaruguru n’iy’Iburasirazuba, bazasubire ku ishuri tariki ya 21 Mata 2013.

Umunyamabanga wa Leta ushinzwe amashuri Abanza n’Ayisumbuye, Dr. Mathias Harebamungu, yavuze ko abanyeshuri bategetswe kuba bambaye umwambaro w’ishuri, abayobozi n’ibigo n’ababyeyi bakubahiriza gahunda nk’uko yatanzwe.

Dr Harebamungu yasabye ko ikigo cya Leta gishinzwe gitwara abagenzi, ONATRACOM , cyazakoresha imodoka zacyo mu kugoboka abanyeshuri bo mu turere tudakunze kubonekamo imodoka.

Mu gihe itaha ry’abanyeshuri rigiye kuba igiciro cya Essence muri iki cyumweru cyariyongereye, Ikigo Ngenzuramikorere gishinzwe imirimo imwe n’imwe ifitiye igihugu akamaro (RURA) kibukije ko abashoferi batagomba kubyitwaza bongera ibiciro.

Deo Muvunyi ushinzwe gutwara abantu n’ibintu muri RURA, ati “Nta wufite ububasha bwo guhindura ibiciro cyeretse inzego zibifitiye ububasha, RURA yiteguye guhana uwaramuka abikoze.”

Ibigo bitwara abagenzi kandi bisabwa gusuzumisha ibinyabiziga byabo kugira ngo umutekano w’abanyeshuri uzabe wizewe, hakanashyirwaho isaha ntarengwa yo guhaguruka hirindwa ko abana bakererwa bigatuma bagera iyo bajya mu ijoro.

MINEDUC itangaza ko Intara y’Amajyepfo iza ku isonga mu kunoza gahunda y’itangira n’itaha ry’abanyeshuri nk’uko gahunda ipa yatanzwe, mu gihe Umujyi wa Kigali utungwa agatoki kutabyubahiriza.

Dr Mathias Harebamungu, Umunyamabanga wa Leta ushinzwe amashuri abanza n'ayisumbuye asaba bo bireba bose kubahiriza gahunda yatanzwe y'itaha ry'abanyeshuri
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO