IGIHE.com > Amakuru > U Rwanda
Muhanga : Umudugudu  wa Kabeza ukoreramo Abahinde  benshi mu Rwanda

Muhanga : Umudugudu wa Kabeza ukoreramo Abahinde benshi mu Rwanda


Yanditswe kuya 29-01-2013 - Saa 17:36' na Gilbert Mwizerwa

Muri iki gihe ushobora kuba watungurwa no kumva ko kuva mu mwaka wa 2009 hatangira kubakwa urugomero rw’amashanyarazi mu murenge wa Mushishiro, Akagari ka Matyazo, Umudugudu wa Kabeza mu karere ka Muhanga, hatangiye guturwa n’abanyamahanga benshi baje gukora imirimo yo kurwubaka biganjemo Abahinde.

Nk’uko twabitangarijwe n’Umunyamabanga Nshingwabikorwa w’uyu murenge Uwamariya Béatrice, ngo kuri ubu mu mudugudu wa Kabeza bacumbikiye Abahinde 243 bakorera isosiyete Angelique International Ltd, babanye neza n’abaturage kuko bafatanya mu buzima bwa buri munsi.

Ati “aba baturanyi bacu ntacyo badutwaye kuko babanye neza n’abaturage, yewe ugasanga banafatanya, cyane ko hari umubare munini w’abaturage bacu bakorana na bo mu mirimo yo gutunganya urugomero rwubakwa mu murenge muri uyu murenge.”

Uwamariya Beatrice, Umunyamabanga Nshingwabikorwa w'Umurenge wa Mushishiro

Abajijwe n’umunyamakuru wa IGIHE, ku makuru avugwa ko Abahinde baba bariraye mu bana b’abakobwa babashukisha amafaranga bamwe bagata amashuri abandi bakaba babyara inda z’indaro, yavuze ko hari igihe koko byigeze kuba, abana b’abangavu bataga ishuri bakagana iy’ubusambanyi, ariko ko babifatiye ingamba zo kubereka inzira ikwiye no kureka iyo mico ibabuza ubusugi ikabandarika. Ku bufatanye n’ababyeyi ngo ubu ibyo byarashize.

Ku kijyanye n’inda z’indaro bivugwa baterwa n’Abahinde yadutangarije ko hari abana 4 bavukiye mu murenge wabo wa Mushishiro ariko abo bakobwa bakaba barahaje mu buryo bwo gushaka akazi.

Umunyamabanga Nshingwabikorwa w’Umurenge wa Mushishiro akaba avuga ko nk’ibi bibazo by’imbyaro biteguye kubishakira umuti uhamye, bakomeza gukangurira urubyiruko kwishyira hamwe bagatizanya imbaraga bakizamura mu bukungu, aho kurarikira ubusambanyi dore ko bashobora no kuhandurira indwara zikomeye nka SIDA.

Umurenge wa Mushishiro ni umwe mu mirenge 12 igize Akarere ka Muhanga, ukaba uherereye mu majyepfo y’Uburengerazuba bwako. Wakunzwe kuvugwamo ibibazo byinshi ahanini bivuye ku miterere y’ubutaka bwaho budakomeye, aho inkangu z’urudaca zahitanaga abantu n’ibintu.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO