IGIHE.com > Amakuru > U Rwanda
Muhima : Mbanjimbere Pierre yaburiwe irengero

Muhima : Mbanjimbere Pierre yaburiwe irengero


Yanditswe kuya 14-01-2013 - Saa 13:51' na Emmanuel Kanamugire

Mbanjimbere Pierre w’imyaka 46 wari utuye mu Mudugudu w’Umutekano, Akagari ka Nyabugogo, Umurenge wa Muhima mu Mujyi wa Kigali, ku wa kane w’icyumweru gishize yaburiwe irengero ubu bikaba bitaramenyekana aho yaba aherereye.

Mbanjimbere wari usanzwe ari umushoferi w’imodoka yo mu bwoko bwa FUSO kuva mu ijoro ryo ku wa Gatatu ntibazi aho aherereye.

Twitegure Habimana Felix wamukoreraga mu rugo yadutangarije ko Shebuja yatashye ahagana saa yine n’igice z’ijoro ku wa kane akinjira mu cyumba cye kuryama, na we (umukozi) agakinga akaryama. Ngo bigeze saa kumi n’ebyiri za mu gitondo abyutse [umukozi] yasanze urugi rukinguye batazi igihe shebuja yagendeye.

Mu kiganiro twagiranye n’umugore we Siboniyo Xaverine utari yaraye mu rugo kuko asanzwe ari umunyeshuri i Butare, yadutangarije ko ibyangombwa na telefoni by’umugabo we babisanze mu nzu nyirabyo adahari kugeza n’ubu bakaba batazi irengero rye.

Avuga ko uyu mugabo nta burwayi ubwo ari bwo bwose asanzwe afite kandi ko nta kibazo bazi yaba yari afitanye n’umukoresha we, keretse ngo yaba yarakigiranye n’abashoferi bagenzi be. Siboniyo avuga ko ibura rya Mbanjimbere rikimenyekana babimenyesheje inzego za Polisi ngo zibafashe gushakisha aho yaba aherereye ariko kugeza ubu bikaba nta cyo biratanga.

Ngenzi Paul, umukoresha wa Mbanjimbere, yatubwiye ko aherukana na we ku wa gatatu nk’i saa tatu z’ijoro amaze guparika imodoka agataha. Ngo bucyeye yamutegereje ku kazi aramubura, atumye kigingi we kumureba mu rugo bamubwira ko yabyutse nka saa cyenda z’ijoro bagira ngo agiye gusenga muri Twibature kuko ubusanzwe yabyukaga saa kumi n’imwe akabanza kujya gusenga.

Avuga ko kuva ubwo ishakisha ryatangiye, akaba yabisobanuye agira ati “Bimaze kugaragara ko ikibazo gitangiye gukomera nahamagaye umugore we bihurirana n’uko na we ikibazo yakimenye ; dukomeza gushakisha bigeze ku wa gatandatu tubimenyesha inzego za Polisi mu Karere ka Nyarugenge, kugeza ubu ntituramenya irengero rye.”

Ubuhamya Ngenzi atanga ni uko nta kibazo na kimwe yagiranaga n’umukozi we kuko yari umukozi w’intangarugero. Ngo nta n’ikibazo cy’uburwayi yari amuziho, usibye ko abo mu muryango we bavuze ko yari amaze iminsi yigunze akaba atanabavugishaga neza.

Twashatse kumenya icyo Polisi ibivugaho, duhamagaye Umuvugizi wa Polisi mu Mujyi wa Kigali Supt. Gakara Albert ntitwamubona kuko telefoni ye itari iri ku murongo, tukaba tukigerageza kuvugana na we.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO