IGIHE.com > Amakuru > U Rwanda
Mukabunani afite impungenge z’umutekano we, abamurwanya bashaka amafaranga

Mukabunani afite impungenge z’umutekano we, abamurwanya bashaka amafaranga


Yanditswe kuya 28-01-2013 - Saa 10:56' na Rene Anthere Rwanyange

Nyuma y’uko hasohotse itangazo rivuga ko itsinda riyoboye PS Imberakuri ryirukanye Mukabunani ku mwanya w’ubuyobozi bw’iryo shyaka ariko we agatangaza ko batazwi nta n’umwanya bafite mu ishyaka, noneho aratangaza ko afite impungenge z’umutekano we ushobora kubangamirwa n’abo bashobora kuba bamufiteho umugambi mubi.

Mukabunani Christine umuyobozi wa PS Imberakuri akaba n’Umuvugizi w’Ihuriro Nyunguranabitekerezo ry’imitwe ya Politiki yemewe mu Rwanda, mu kiganiro yagiranye na IGIHE yadutangarije ko buri gihe iyo amatora yegereje hari abahoze ari abaoboke b’ishyaka ayoboye ariko ngo nyuma baza kwirukanwa, bakwirakwiza ibihuha bagamije gutesha abantu umutwe. Yagize ati “Ubwo amatora y’abadepite yegereje bafite impungenge ko ishyaka ryacu na ryo rizatanga abakandida. Ni n’uko byagenze igihe cy’amatora ya Perezida wa Repubulika mu 2010. Icyo bagamije nta kindi uretse kuzana akaduruvayo no guhundabanya umutekano.”

Yadutangarije ko Hakizimfura Noel uvuga ko ari umunyamabanga mukuru w’ishyaka PS Imberakuri yirukanwe mu 2009 Me Ntaganda akiyobora iryo shyaka. Agira ati “Ntiyigeze agaruka gusaba imbabazi ngo bisuzumwe niba ashobora kugaruka. Ni ukuvuga ko icyemezo yafatiwe kikiriho atari umuyoboke wacu.”

Ku birebana n’uko Niyitegeka Augustin byatangajwe ko ariwe ubu uyoboye ishyaka, Mukabunani agira ati “Niyitegeka nta kintu na kimwe yigeze ashingwa mu ishyaka. Ikindi kandi na we kubera imyitwarire mibi ijyanye no gushaka guzana amacakubiri twaramwirukanye. Ntacyo ari cyo rero kuko ntitugikorana na we.

Mukabunani yakomeje adutangariza ko inzego zose z’ishyaka zahinduwe ndetse n’amategeko abagenga yahindutse kuko aya mbere yasumbanyaga abayoboke. Yagize ati “Ibyo kuvuga ko hari abanyamuryango bashinze ishyaka abandi bakazaza ari abungirije ibyo twabikuyemo, abayoboke bose bafite uburenganzira bungana. Abagitsimbaraye ku mategeko yashaje ntitukiri kumwe.”

Ubu ngo inzego ziyoboye ishyaka ni izatowe na Kongere yatumijwe ku buryo bwemewe n’amategeko abataboka barasimbuwe. Atangaza ko ubwo Ntaganda yafungwaga bamwe mu bari bagize Komite Nyobozi ntibongeye kuboneka, bityo hatorwa ababasimbura, Inama y’abaminisitiri irabemeza basohoka no mu Igazeti ya Leta. Ati “Ibyo twakoze byose byemewe n’amategeko.”

Ku birebana n’ikibazo cy’umutekano we afitiye impungenge, atangaza ko ibitangiye gukorwa abona hari ibindi bibyihishe inyuma ku buryo bashobora no kumugirira nabi baramutse ibyo bashaka bitagezweho. Abihuza no mu mwaka wa 2011 aho ngo Hakizimfura yagiye kumutwikira ariko umugambi ngo uza kumupfubana.

Pasteri Hakizimfura Noel, mu kiganiro twagiranye yadutangarije ko ibyo banditse ari uburenganzira bwabo nk’abayoboke ba PS Imberakuri. Ati “Nta mugambi dufite wo guhungabanya umutekano wa Mukabunani, ahubwo afite ubwoba bw’inyandiko yabonye, kuko ibyo tuvuga ari ukuri.”

Ubwo Mukabunani aherutse muri Leta Zunze Ubumwe za Amerika ahagarariye u Rwanda mu gukurikirana amatora ya Perezida w’icyo gihugu, mu kugaruka kwe uwitwa Pasiteri Hakizimfura Noel na Niyitegeka Augustin ngo bamusabye ko yabaha amafaranga akagumana ishyaka, cyangwa se bakicara akabashyira mu myanya y’ubuyobozi bwaryo.

Ikindi ngo ni uko bifuza kujya ku rutonde rw’abakandida b’abadepite bazatangwa n’ishyaka. Icyifuzo cyabo kidashyizwe mu bikorwa bakaba babona ngo baba bibagiranye burundu.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO