IGIHE.com > Amakuru > U Rwanda
Musanze : Yishe umugore we ahita acika

Musanze : Yishe umugore we ahita acika


Yanditswe kuya 4-02-2013 - Saa 14:04' na Emmanuel Kanamugire

Mu Kagari ka Karwasa, Umurenge wa Gacaca mu Karere ka Musanze haravugwa urupfu rw’umugore witwa Mushimiyimana Oliva wahitanywe n’umugabo witwa Bugingobwimana Theogene ahita acika.

Amakuru atugeraho avuga ko Bugingobwimana yishe umugore we amutemye ahagana saa kumi zo mu rukerera rwo ku itariki ya 04 Gashyantare 20`13 ahita acika.

Byaje kumenyekana ubwo Local Defense wari uvuye ku irondo yanyuraga kuri urwo rugo agasanga abana barira cyane nyina amaze gupfa, ahita abimenyesha inzego z’umutekano.

Mugabo Jean Claude uturanye n’urugo rwabereyemo ubwicanyi, yatangarije IGIHE ko uyu mugabo yahoraga ashinja umugore we ko ari umunebwe adakora, muri uwo muryango ngo hahoraga intonganya.

Mugabo yavuze ko mu gihe gishize, Bugingobwimana yigeze gutema umugore we bari mu murima bahinga ararusimbuka, ni bwo umugabo yacikaga akaza kugaruka iwe nyuma y’amezi ane ubuyobozi bw’ibanze butamenye aho yabaga, buterera agati mu ryinyo ntibwabikurikirana.

Umuvugizi wa Polisi mu Ntara y’Amajyaruguru, Francis Gahima, yadutangarije ko inzego z’umutekano zigishakisha Bugingobwimana watorotse nyuma yo gukora aya mahano.

Yasabye abaturage gutanga amakuru ku ngo zizwiho amakimbirane, kugira ngo inzego zibishinzwe ziyahoshe.

Abaturage kandi basabwe kudakora amarondo bya nyirarureshwa kuko uyu mubyeyi yishwe abaraye irondo bamaze gutanga raporo ko umutekano umeze neza muri aka Kagari.

Muri aka Kagari ngo harabarurwa ingo zegera kuri 13 zirangwamo amakimbirane akaze ashobora no kubyara impfu nk’izi.

Nyakwigendera wari umaranye imyaka itanu n’umugabo bashakanye wamwivuganye, asize imusozi abana batatu.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO