Ngoma : Ingona yivuganye Mukeshimana agiye kuvoma

Nyakwigendera Mukeshimana Esperance w’imyaka 21 ingona yamufatiye ku mwaro wo ku kiyaga cya Birira agiye kuvoma, ahasiga ubuzima.

Iki kiyaga giherereye mu Murenge wa Rukumberi mu Karere ka Ngoma ngo kibamo ingona nyinshi. Uyu nyakwigendera wo mu Mudugudu wa Ruyenzi ya mbere Akagari ka Rubona, iyo ngona ngo yamufashe ku wa Gatandatu ahagana mu ma saa moya za mugitondo ku munsi w’umuganda.

Umunyamabanga Nshingwabikorwa w’Umurenge wa Rukumberi Nyamutera Emmanuel aganira na Radiyo Izuba dukesha iyi nkuru, yatangaje ko mu rwego rwo kugerageza guhangana n’izi ngona zimaze kwivugana abantu batanu, ngo kuri iki kiyaga hagiye kuzubakwa uruzitiro, kandi harimo no gushakwa uko abagituriye bahabwa amazi ntibakomeze kuvoma ay’ibiyaga. Ngo banavuganye na REMA ngo barebe icyo yabunganiraho mu gukemura iki kibazo.

Umunyamabanga Nshingwabikorwa w’Umurenge wa Rukumberi atangaza ko nk’ubuyobozi bahangayikishijwe bikomeye no kuba abaturage bo muri ako gace kegereye ikiyaga cya Birira badafite za kano.

Si mu karere ka Ngoma gusa kuko n’aka Bugesera mu kiyaga cya Rubira ingona zimaze iminsi zihitana abantu batari bake.