IGIHE.com > Amakuru > U Rwanda
Nsinda: Ubuyobozi bw’ikigo buratungwa agatoki ku gutwita kw’abanyeshuri 26

Nsinda: Ubuyobozi bw’ikigo buratungwa agatoki ku gutwita kw’abanyeshuri 26


Yanditswe kuya 4-02-2013 - Saa 07:38' na IGIHE

Mu rwunge rw’amashuri rwa Nsinda mu Karere ka Rwamagana, haravugwa gutwita kw’abanyeshuri bagera kuri 26, benshi muri bo bakaba batujuje imyaka y’ubukure.

Umuyobozi w’iki kigo, Emmanuel Usabye, kuva mu cyumweru gishize yasabwe kutongera gukandagiza ikirenge muri icyo kigo mu gihe polisi igikora iperereza ngo hamenyekane uburyo aba banyeshuri bagiye baterwamo inda ndetse n’uwaba abyihishe inyuma.

Mu byo Usabye atungwaho agatoki, usibye kuba ataritwaye neza mu kibazo cyo gutwita kw’abanyeshuri afata ibyemezo bikwiye, aranaregwa gucunga nabi umutungo w’iki kigo. Bamwe muri abo banyeshuri 26 batwite barabyaye mu gihe abandi kuri ubu bakuriwe.

Nk’uko tubikesha The New Times, Umuyobozi wa Komite y’ababyeyi barerera muri icyo kigo, Ndayambaje Francois, yatangaje ko yatahuye ikibazo cy’imicungire mibi y’umutungo no kutita ku bintu kw’abarimu muri icyo kigo, bityo akaba asanga guhagarikwa kwa Usabye biri butume hakorwa iperereza ukuri kukamenyekana.

Umwe mu barimu utarashatse ko izina rye rimenyekana yatunze agatoki umwe mu bari mu nzego z’ubuyobozi bw’ikigo ko yaba ari we ushobora kuba yarateye benshi mu banyeshuri inda, gusa ngo uyu yiyahuye umwaka ushize nk’uko dukomeza tubikesha The New Times.

Uwo mwarimu yakomeje atangaza ko kubyara kw’abanyeshuri kwatangiye kugaragara muri icyo kigo kuva mu mwaka wa 2011, gusa ngo guhera icyo gihe wasangaga ntawe ubyitayeho nyamara iri shuri riherereye bugufi n’ibiro bishinzwe uburezi mu Karere ka Rwamagana.

Ndayambaje yavuze ko bari baragiye bumva imyitwarire mibi yavugwaga kuri bamwe mu bakozi b’iki kigo, gusa ngo ugasanga amakosa yose bayashyira ku babyeyi babashinja kudaha uburere bwiza abana babo.

Umuyobozi w’ihuriro rishinzwe kurwanya SIDA mu murenge wa Muhazi, Theophile Cyiza, yatangaje ko batangiye gushyira iki kibazo ku karubanda nyuma y’aho mu mezi abiri ashize bapimiye abanyeshuri bagansaga harimo umubare munini w’abatwite n’ababyaye, yongeyeho ko hari bamwe muri bo basanze barabyaye babazwe bitewe n’uko bari bakiri bato ku buryo batari kubasha kubyara mu buryo busanzwe.

Umunyamabanga wa Leta ushinzwe amashuri abanza n’ayisumbuye muri Minisiteri y’Uburezi Dr Mathias Harebamungu yatangaje ko iki kibazo cyo gutwita kw’abanyeshuri i Nsinda cyamugezeho, gusa we agasanga abayobozi b’akarere bataragize icyo bakora ngo bagikemure.

Hagati aho iperereza kuri iki kibazo rirakomeje, ndetse kuri ubu usibye kuba Akarere ka Rwamagana karagihagurukiye, na Guverineri w’Intara y’Uburasirazuba Odette Uwamariya, yashyizeho Komite yihariye ishinzwe kugikurikirana. Intego ni uko abafite uruhare mu gutera inda abanyeshuri bose bazatabwa muri yombi bagahanwa binyuze mu mategeko, nk’uko Guverineri abitangaza.

Foto: The New Times

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO