IGIHE.com > Amakuru > U Rwanda
Nta midari n’amashimwe biteganyijwe gutangwa ku munsi w’intwari muri 2013

Nta midari n’amashimwe biteganyijwe gutangwa ku munsi w’intwari muri 2013


Yanditswe kuya 27-01-2013 - Saa 13:35' na Faustin Nkurunziza

Ubwo hari hamenyerewe ko ku munsi w’intwari, kuri Sitade Amahoro i Remera, ku wa 1 Gashyantare hatangwa imidari n’amashimwe ku bakoze ibikorwa bikomeye, uyu mwaka si ko bizagenda.

Mu kiganiro mbwirwaruhame cyatambutse kuri radiyo na televiziyo by’igihugu, hatangajwe ko uwo munsi uzizihirizwa ku rwego rw’Imirenge n’Imidugudu, kuko nta gikorwa ku rwego rw’igihugu cyo gutanga amashimwe cyangwa imidari gihari.

Umunyamabanga Mukuru w’Urwego rw’Igihugu rushinzwe Intwari z’Igihugu, Kamali Karegesa, yagize ati “Nta mashimwe cyangwa imidari iteganyijwe gutangwa igihe cyo kwibuka intwari ku wa 01 Gashyantare”.

Akomeza avuga ko imihango yo kwibuka intwari bizegerezwa abaturage bibere mu midugudu n’imirenge, aho kuba kuri sitade hatangwa impeta n’imidari, kuko abari baramaze gukorerwaho ubushakashatsi ko babikwiye babihawe.

Kamali avuga ko hamaze iminsi hatangwa ibiganiro hirya no hino mu bitangazamakuru, amashuri n’ahandi kugira ngo Abanyarwanda bumve agaciro k’intwari, kandi nabo baharanire ubutwari.

Minisitiri w’Umuco na Siporo, Protais Mitali, avuga kwizihiza umunsi w’intwari biri mu rwego rwo guha agaciro ibyo zakoze, kandi bikaba byaha n’urugero abandi.

Mitali avuga kandi ko ari ngombwa ko hakorwa ubushakashatsi bwimbitse ku banyarwanda bakomeza kugaragaza ubutwari, ku buryo buri wese uhaye agaciro guharanira ubutwari u Rwanda rwatemba amata n’ubuki.

Dr.Iyamuremye Augustin, Umukuru w’urwego rw’intwari, avuga ko buri munsi mu Banyarwanda hashobora kuboneka intwari, bitewe n’ibikorwa bye, bikemezwa n’ubushakashatsi.

Ibyiciro by’intwari byibukwa ni Imanzi, Imena n’Ingenzi, birimo Intwari Maj. Gen. Fred Gisa Rwigema, Uwiringiyimana Agatha, Umwami Mutara wa III Rudahigwa, Michel Rwagasana n’ingabo itazwi, Niyitegeka Félicité, n’abana biciwe i Nyange.

Zimwe mu ntwari z'u Rwanda

Insanganyamatsiko y’uyu mwaka iragira iti “ Ubutwari ni ishingiro ry’agaciro n’iterambere”.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO