IGIHE.com > Amakuru > U Rwanda
“Ntawe ukwiye guterwa ipfunwe n’ibyo yize”

“Ntawe ukwiye guterwa ipfunwe n’ibyo yize”


Yanditswe kuya 31-01-2013 - Saa 16:53' na Umurerwa Emma-Marie

Bamwe mu banyeshuri bize ibijyanye n’amahoteli n’ubukerarugendo, baterwa ipfunwe n’ibyo bakurikiye, rimwe na rimwe bagahindura bakiga ibindi. Bamwe mu babyeyi bakavuga ko umwana wabo atakwiga ibijyanye n’ayo masomo.

Nk’uko bamwe mu bize abijyanye n’amahoteli n’ubukerarugendo babidutangarije, bamwe muri bo ngo bibatera ipfunwe, abandi ntibatinyuke kuvuga aho bakora.

Munyana Aline, afite impamyabumenyi y’amashuri yisumbuye, yavuze ko kubera bamwe mu bantu baziranye, bamubwira ko yize ubuyaya n’andi magambo atandukanye, ngo yahisemo guhindura yiga andi masomo.

Ibi ariko ngo bitera ipfunwe abakobwa kuruta abahungu.
Ngirinshuti Damien, we si ko abibona kuko ngo umuntu yiga ibyo akunze, atagomba kugendera ku myumvire y’abandi.

Ngirinshuti yagize ati ’’Nabyize mbikunda, kuba abantu babisebya ntacyo bimbwiye, babiterwa n’imyumvire yabo ikiri hasi. Narangije amashuri yisumbuye, ubu ndi mu makuru, numva nindangiza kwiga nzihangira imirimo. Ababyize ni twe dukwiye guhindura imyumvire y’ababisuzugura.”

Mukarubega Zulfat washinze Ishuri rikuru ryigisha ibijyanye n’amahoteli n’ubukerarugendo (RTC), byose biterwa n’ikibazo cy’imyumvire, ngo kubera ko ayo masomo nta gihe kinini aramara atangiye kwigishwa mu Rwanda.

Mukarubega yagize ati ’’Abavuga ko kwiga aya masomo ari ukwiga ububoyi, twabasaba guhindura imyumvire, kuko aya ni amasomo nk’ayandi, kandi yaje akenewe cyane mu Gihugu cyacu. Kuva aho RTC itangiriye mu mwaka wa 2007, tumaze kubona impinduka mu mitangire ya serivisi.Ababyeyi na bo ntibakwiye kujya babuza abana babo kwiga aya masomo mu gihe bayakunda.”

Yakomeje avuga ko inzego zose bireba zikwiye gukomeza kurushaho kugira uruhare mu gusobanurira abantu akamaro k’ayo masomo, mu rwego kurushaho gutanga serivisi nziza.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO