IGIHE.com > Amakuru > U Rwanda
Ntibahiriwe no gushinga ishuri nyuma kwitandukanya n’iryo bakoreraga

Ntibahiriwe no gushinga ishuri nyuma kwitandukanya n’iryo bakoreraga


Yanditswe kuya 22-01-2013 - Saa 10:29' na Olivier Rubibi

Abarimu barindwi bigishaga mu ishuri ribanza rya Saint Charles mu Murenge wa Nyamirambo mu Karere ka Nyarugenge, bitandukanyije n’ishuri bigishagamo bashinga ishuri baryita Saint Nicolas ariko ntibyabahira kuko batemerewe gutangira kwigisha.

Aba barimu bavuga ko basezeye muri Saint Charles kubera ko ubuyobozi bw’iri shuri butabubahaga.

Mushinzimana Adrien, yahoze yigisha muri Saint Charles ariko aza kuhava. Mu kiganiro twagiranye yaduhaye ishusho y’ubuzima abarimu bo muri iri shuri babagamo ; agaragaza ko ubwo buzima butari bwiza ari na cyo cyatumye we na bagenzi be bafata umwanzuro wo kujya gushinga iryabo.

Saint Nicolas ryabujijwe gutangira kuko ritujuje ibyangombwa Ikigo Gishinzwe Uburezi mu Rwanda REB kigenderaho cyemeza ko ishuri ryakira abanyeshuri.

Uyu Mushinzimana avuga ko kuva muri Saint Charles byatewe n’ubuyobozi yita bubi bw’iri shuri.

Avuga ko ubuyobozi bwongezaga amafaranga buvuga ko bugiye kongeza imishara y’abarimu nyamara ntibishyirwe mu bikorwa. Ikindi ngo ubuyobozi bwa Saint Charles bwari bukuriwe na Ndushabandi bwagiye burangwa no gutera ubwoba abarimu, kugeza n’igihe Ndushabandi yashyizeho komite ishinzwe umutekano mu kigo nk’uburyo bwo kubabuza amahoro.

Mu kiganiro twagiranye na Ndushabandi ariko ibi byose yarabihakanye, ati “ Ntabyo nzi rwose.”

Gusa ibyo Mushinzimana avuga ntibihuye n’ibyo Kayitare Claver usigaye ari umuyobozi wa Saint Charles wasimbuye Ndushabandi avuga.

Kayitare avuga ko ibivugwa n’abarimu atari ukuri kuko aba barimu batangiye kutumvikana n’ubuyobozi ataraba umuyobozi w’iki kigo. Gusa ngo aho abereye umuyobozi iki kibazo yarakimenye ndetse nk’umuyobozi ashaka uburyo cyakemuka.

Mu byo Mushinzimana yadutangarije, ati “Kongeza amafaranga mu ishuri Saint Charles ntabwo bikorwa n’ubuyobozi bw’ishuri, ahubwo ni Inama y’ababyeyi ni yo yicara ikareba igikenewe igaheraho yongeza amafaranga.”

Kayitare akomeza avuga ko Ndushabandi wari umuyobozi w’iri shuri atigeze yongeza amafaranga, ati “Amafaranga y’ishuri ni jyewe wayongeje nyuma yo kubyemeranya mu nama y’ababyeyi.”

Akomeza avuga ko we yasanze aba barimu barashinze umuryango bitaga Ubumwe, akawusobanura agira ati “Uyu muryango ni na wo washinze ishuri Saint Nicolas. Mu by’ukuri aba barimu bakoze ibintu bari barateguye, kuko tuganira nkabasaba gusasa inzobe ngo dukemure ibibazo byari muri iri shuri bambwiye ko jyewe ntabizi ari na yo mpamvu ntabasha kubikemura.”

Ku kijyanye no kutongeza aba barimu ku mushahara, Kayitare yatubwiye ko aba barimu basabaga kongezwa 100%. Gusa bo ngo bari barabongeje 20% bitewe n’ubushobozi bw’ikigo. Ku bwe ngo ibyo bavuga byatumye bava kuri Saint Charles ni urwitwazo, ngo bashakaga gusenyera ishuri mu rindi.

Nyuma yo guhagarikwa gutangiza Saint Nicolas kuko batabifitiye uburenganzira, abo barimu uko ari barindwi bari aho nta kazi bafite.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO