IGIHE.com > Amakuru > U Rwanda
Nyabugogo: Mayibobo zo mu itsinda ryiyise “Abamarine” zasahuye imodoka zatwawe n’umuvu

Nyabugogo: Mayibobo zo mu itsinda ryiyise “Abamarine” zasahuye imodoka zatwawe n’umuvu


Yanditswe kuya 24-02-2013 - Saa 15:59' na Andrei Gromyko

Ku mugoroba wo kuri uyu wa Gatandatu mu Mujyi wa Kigali haguye imvura ikomeye ivanze n’umuyaga wari ufite ingufu nyinshi, ku buryo hirya no hino muri uyu mujyi hari byinshi byangiritse. Mu gace ka Nyabugogo umuvu watwaye byinshi birimo n’amamodoka agera kuri abiri. Mu gitondo cyo kuri iki Cyumweru ahagana mu ma saa kumi n’ebyiri n’igice, mayibobo zo mu itsinda ryiyise “Abamarine” zabyutse zisahura ibyasigaye mu modoka ebyiri zangijwe bikomeye n’umuvu, ndetse imwe ikagwamo n’abantu.

Abaturage batuye mu gace ka Nyabugogo bari bashungereye ari benshi mu gitondo kare baje kureba amamodoka yatwawe n’umuvu w’amazi, baguye mu kantu ubwo basangaga mayibobo zo mu itsinda ryiyise “Abamarine” zirimo kwiba bimwe mu byasigaye muri izo modoka zatwawe n’umuvu birimo batiri n’ibindi byuma bitandukanye bizigize.

Kugira ngo biborohere, ab’inkorokoro muri izi nsorensore bateruye imwe muri izo modoka yo mu bwoko bwa Toyota RAV4, barayigarika kugira ngo babashe gufungura neza ibyuma biyigize bahereye hasi bajya hejuru.

Iyi modoka yo mu bwoko bwa RAV4 yarangiritse bikomeye ku buryo kumenya ubwoko bwayo na byo bigoye. Bivugwa ko ubwo yatwarwaga n’umuvu w’amazi nta muntu wari uyirimo kuko yari iparitse iruhande rw’umuhanda.

Indi modoka yasahuwe ni iyo mu bwoko bwa Toyota Corolla na yo yangiritse bikomeye ndetse ipfiramo abantu bagera kuri batatu b’igitsinagore; bivugwa ko umwe muri batatu bari bayirimo yari afite uruhinja benshi bakomeje kwemeza ko rwaburiwe irengero.

Yaburiwe ariko arakomeza arahanyanyaza…

Ubwo imvura yagwaga, amazi yuzuye agace kose ka Nyabugogo, kugeza ubwo urukuta rwubatswe mu matafari ya Ruriba rutandukanya Gare Nkuru ya Kigali na station ya lisansi ya Engen rwarengewe n’amazi, amazu yose yo muri Gare ndetse n’ayo mu nkengero zayo nko ku mazu bita “Ay’Amashyirahamwe” hose hari harengewe n’amazi.

Abategarugori batatu bari mu modoka ya Toyota Corolla baje baturutse kuri feux rouge za Nyabugogo bagana mu mujyi, umwe muri bo atwaye. Bakimara kurenga feux rouge, bamwe mu bari mu nyubako z’amashyirahamwe hejuru ahatageze umuvu w’amazi batubwiye ko baburiye umugore wari utwaye iyo Corolla, bamucira amarenga bamubwira ko byaba byiza asubiye inyuma kuko umuvu w’amazi wari imbere warimo wiyongera ubutitsa.

Uyu mudamu wari utwaye imodoka yakomeje guhanyanyaza agana mu mujyi, gusa umuvu waje guterura imodoka uyita ku rundi ruhande rw’umuhanda, mu cyerekezo cy’abava mu mujyi. Aha abari ku nzu z’’Amashyirahamwe’ muri etaje hejuru barimo babireba ari na bo baduhaye aya makuru.

Hashize akanya gato, iyo modoka umuvu waje kuyijugunya muri ruhurura iri iruhande rwa Gare, ruhurura ya metero zirenga eshatu, irakomeza iratwarwa ndetse ica hejuru y’umuhanda wa Poids Lourd na wo wari warengewe n’amazi, irambukiranya iza guhagama hafi y’iteme rihuza Nyabugogo na Gatsata, abari bayirimo batakirimo umwuka.

Ubwo imvura yahitaga, abashinzwe umutekano n’ubutabazi bari bakwiye hirya no hino ahagiye habera insanganya ziturutse ku mivu y’amazi n’umuyaga, bamwe muri bo baje bagerageza kurohora izi modoka birananirana, ziraharara, ari na ho abo mu itsinda ryiyise ‘Abamarine’ bazisanze bazibamo bimwe mu byuma byari bizisigayeho.
Bamwe mu bagize iri tsinda twatangarijwe ko iyo imvura yaguye kenshi Nyabugogo hakunze kuba umwuzure, cyane mu gice cyegereye igishanga, ku buryo usanga ari bo baba bambutsa abantu bakabarenza amazi babahetse, bakishyurwa.

Uku ni ko imodoka yari imeze mbere yo gusagarirwa n'abiyise abamarine
Aha 'Abamarine' barimo bambuka bagana aho imodoka bari bagiye gusahura yari iri
Ibyuma byakurwaga ku modoka byashyirwaga mu mifuka mbere yo kujyanwa
Ngiyo batiri y'imodoka barayijyanye
Mu gihe abiyise 'Abamarine' barimo gusahura imodoka, abari babashungereye bari benshi
Bamwe bafunguranga ibyuma ku modoka, bakabihererekanya n'abandi
Abiyise 'Abamarine' aha barimo bagana ku musozo, ibyuma byose by'imodoka bibasha gutwarika bari babimaze
Ibyondo byari byuzuye ahantu hose no mu mazu imbere mu gace ka Nyabugogo
Ingiga y'igiti bamwe bavuga ko yaturutse kuri kimwe mu biraro bya Kimisagara byangiritse, aha cyari cyageze ku iteme rigana mu Gatsata
Ibyapa byihinnye
Ibyapa bitihinnye byarandutse
Amazu yasakambutse
Bimwe mu bisenge byasakambutse biranaguruka
N'inyoni nazo zahasize ubuzima

Amafoto: Andrei Gromyko

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO