IGIHE.com > Amakuru > U Rwanda
Nyabugogo yafatiwe ingamba nyuma yo guhitana 5

Nyabugogo yafatiwe ingamba nyuma yo guhitana 5


Yanditswe kuya 22-05-2012 - Saa 09:09' na Jotham Ntirenganya

Bitewe n’uko umugezi wa Nyabugogo umaze gutwara abantu 5 kuva Gicurasi itangiye, kuri uyu wa 21 ubuyobozi bwatumije inama y’igitaraganya kugira ngo akagari ka Nyabugogo n’aka Nzove bifate ingamba zo kwirinda kuko bihuriye kuri uyu mugezi.

Umuyobozi w’umurenge wa Kigali aka kagari gaherereyemo, Munyaneza Aimable yavuze ko n’ubwo ibiza bitungurana ariko hari ingamba zikwiriye gufatwa.

Munyaneza yongeye kwibutsa ko bamwe mu barohamye hari n’abizize kuko harimo n’umugabo warohamye azize intego y’amafaranga 200 yari yemerewe na bagenzi be, mu kugaruka ava hakurya agwamo arafpa.

Umwana witwa Ndoli Ngendahayo w’imyaka 13, akaba yararohamye ubwo yakiniraga umupira mu kibuga cy’umupira kiri ku nkengero z’uyu mugezi wa Nyabugogo, mu mupira wari wahuje abana bo mu murenge wa Kimisagara n’abandi bo mu kagari ka Nyabugogo.

Ubwo umupira wari urangiye yagiye ku nkengero z’umugezi wa Nyabogogo agira ngo amese ikabutura yari yahindanye kuko iki kibuga n’ubundi kirimo isayo nyinshi.

Yaje kugwamo kugwamo abandi bana bacyeka ko ari mugenzi wabo uguyemo.

Uwitwa Kwizera Placide bakinanaga yagize ati : “Twumvise mu mazi haguyemo ikintu tugirango ni umupira uguyemo.”

Kwizera yongeyeho ko yigeze kurohora abantu 2 bakuru kuko azi koga.

Ati : “Twe ntiyagwamo duhari ngo aducike turamutse tumubonye agwamo.”

Gusa n’ubwo ubuyobozi bubuza umuntu wese wishora muri aya mazi, tuhagera twasanze hari abarobyi bafashe amafi, umwe ati : “Sinareka aka kaboga kandi nzi koga”.

Uyu mugezi wa Nyabugogo ukunze gutwara abantu cyane cyane harimo n’abana kandi akenshi aba bana baba bakinira umupira muri iki kibuga kiri ku nkengero za Nyabugogo.

Bamwe muri abo bana bati : “Iyo umupira uguyemo twohereza undi uzi koga akavanamo umupira, ariko utazi koga agendera kure uyu mugezi”.

Supt. Kayijuka Benoit uhagarariye Polisi mu karere ka Nyarugenge yasabye abaturage kujya batanga amakuru hakiri kare kuko ngo iyo uriya mwana amenyekana hakiri kare aba yararohowe.

Yongeraho ati : “Umubyeyi ajye agerageza kumenya aho umwana we ari”.

Kugeza ubu abahanga mu byo mu mazi mu nzego z’umutekano bari gushakisha umurambo w’uriyamwana uherutse kurohama n’ubwo batarabasha kuwubona.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO