IGIHE.com > Amakuru > U Rwanda
Nyagatare : Umugore yataye umwana mu musarane

Nyagatare : Umugore yataye umwana mu musarane


Yanditswe kuya 20-11-2012 - Saa 08:32' na IGIHE

Tengera Jennifer w’imyaka 39 y’amavuko wo mu Mudugudu wa Kayigiro, Akagali ka Gitengure ari mu maboko ya Polisi station ya Nyagatare guhera kuri uyu wa 17 Ugushyingo, nyuma y’aho mu ijoro ryo kuwa 15 abyariye umwana ngo ufite ubumuga kandi atagejeje n’igihe akazinduka amuta mu musarane.

Abaturage bemeza ko impamvu yakoze aya mahano ari uko yatinyaga ko abana b’umugabo we bakuru bamenya ko yongeye kubyarwaho na rubanda.

Uretse umugabo we na Yankurije Libertha uzwi ku izina rya Mugeni ngo ni bo bonyine bari basanzwe bazi ko uyu Tengera atwite. Ahagana saa tatu z’ijoro kuwa kane ni bwo yumvise aribwa mu nda ajya ku musarane ari naho yabyariye.

Nyuma yo kubona ko yabyaye umwana utagejeje igihe kandi wapfuye ngo yigiriye inama yo kumuta mu musarane. Tengera ariko ahakana yivuye inyuma ko atagerageje gukuramo iyi nda, aho yemeza ko umuti yanyoye ngo wari umubirizi kuko yivuraga inzoka.

Ibi avuga ariko binyomozwa na Yankurije Libertha ari nawe wamufashije kubyara ndetse bakanararana iryo joro. Kuri we yemeza ko Tengera yabyariye mu nzu ndetse ngo na nyuma yo kubona ko umwana yavutse apfuye agira inama nyir’ukubyara yo kubimenyesha abantu agashyingurwa n’ubwo undi ngo atabikozwaga. Ngo yazindutse ataha ariko agarutse asanga umwana yamaze gushyirwa mu musarane, ndetse asabwa na nyir’ubwite kutamuvamo.

Uyu Yankurije kandi yemeza ko yari asanzwe azi neza ko uyu Tengera yanywaga imiti yo gukuramo iyo nda kuko ngo itari iy’umugabo we.

Benshi mu gace aba batuyemo bemeza ko igikorwa nk’iki cyari kimenyerewe ku bakobwa banga kubyara batarashaka. Umwe mu bakecuru twaganiriye wanaje gusengera Tengera ku cyumweru gishize kuko yari arwaye n’ubwo atari azi ko afite inda, basenganaga Tengera yavuze ko gukuramo inda bigayitse cyane kandi ngo n’ubyaye upfuye ntagomba kumuta mu musarane.

Muzehe Rwivanga utazi imyaka ye y’ubukure uretse ko yibuka ko yavutse mu iragara, mu Kinyarwanda kizimije yemera ko yari asanzwe azi ko umugore we yari atwite n’ubwo atari we wabimubwiye, gusa ngo kubyara kwe ntako yari azi.

Uyu musaza usanganwe ubumuga bwo kutagenda kubera imvune amaranye igihe, yifuza ko ngo umugore we akwiye gufungurwa kuko we wari utunze umuryango n’ubwo yemera ko ubundi umucyaha aba akwiye guhanwa.

Haba abaturanyi ndetse n’ubuyobozi bw’akagali ka Gitengure bemeza ko impamvu Tengera yahishe ko atwite ndetse agakuramo n’inda ari uko yatinyaga ko abana abereye mu kase ari nabo bamushyingiye se wabo kugira ngo amushajishe bamenya ko yongeye kubyarana n’abandi bagabo kuko ngo byabayeho ndetse ngo icyo gihe akaba yarihanangirijwe n’abo basore bahagera baje kubasura. Ikindi kandi ngo n’uko uwo mwana yavukanye ubumuga nk’uko bisobanurwa na Bashayija Sam, umunyamabanga nshingwabikorwa w’akagali ka Gitengure.

Tengera Jennifer ukekwaho gukuramo inda agata n’umwana mu musarane ni umubyeyi w’abana 4 ndetse nk’uko abyemeza ngo iyi nda yabyaye ntiyari azi igihe yayisamiye n’ubwo akeka ko ari hagati y’amezi 5 na 6,dore ko ngo yari yaraboneje urubyaro.

Iyi nkuru y’uko yataye umwana mu musarane yamenyekanye ku mugoroba wo kuri uyu wa gatanu, gusa uyu mwana yakuwe muri uwo musarane mu gitondo cyo kuri uyu wa gatandatu adafite umutwe ari nabwo yashyinguwe .

Orinfor

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO