Kwamamaza

Nyamasheke: Abari ku Rugerero ngo biteguye kugira uruhare mu kwihutisha iterambere

Yanditswe kuya 24-01-2013 saa 08:38' na Denys Basile Uwingabiye
     


Ku wa kabiri tariki ya 22 Mutarama 2013 ubwo abagize itorero ry’abarangije amashuri yisumbuye mu Karere ka Nyamasheke batangiraga Urugerero ruzibanda ku bikorwa by’ubwitange mu gihe cy’amezi atatu, aba basore n’inkumi batangiranye n’umuganda wo gutera ibiti ku muhanda wa kaburimbo mu Murenge wa Bushekeri; bakaba baratangaje ko biteguye kwihutisha iterambere ry’igihugu.
Abatangiye Urugerero muri uyu murenge uko ari 82, bavuga ko uyu ari umwanya wo kugira uruhare mu bikorwa byo kwihutisha (...)

Ku wa kabiri tariki ya 22 Mutarama 2013 ubwo abagize itorero ry’abarangije amashuri yisumbuye mu Karere ka Nyamasheke batangiraga Urugerero ruzibanda ku bikorwa by’ubwitange mu gihe cy’amezi atatu, aba basore n’inkumi batangiranye n’umuganda wo gutera ibiti ku muhanda wa kaburimbo mu Murenge wa Bushekeri; bakaba baratangaje ko biteguye kwihutisha iterambere ry’igihugu.

Batangiranye imbaraga ku Rugerero batera ibiti ku muhanda

Abatangiye Urugerero muri uyu murenge uko ari 82, bavuga ko uyu ari umwanya wo kugira uruhare mu bikorwa byo kwihutisha iterambere ry’igihugu. Umwe muri bo witwa Irihose Callixte, avuga ko gahunda y’urugerero izabagirira akamaro kanini kuko bamaze kumenya ko amajyambere atava mu kirere ahubwo ava mu maboko y’abaturarwanda; bityo bakaba biteguye gufatanya n’abandi mu kwiyubakira igihugu.

Harerimana Edouard urangije amashuri yisumbuye afite imyaka 43, avuga azafasha abana bataye ishuri kugira ngo barisubiremo ndetse yigishe gusoma no kwandika abatabizi kuko ngo yamenye ibyiza byo kwiga n’uruhare bigira ku iterambere.

Ku Rugerero banyuzamo bakanidagadura

Niwemukobwa Aline wari uhagarariye Itorero ry’Igihugu, yabwiye abatangiye Urugerero ko ari urubyiruko bakaba ari imbaraga z’igihugu. Yababwiye ko ubupfura batojwe no kumenya gahunda zose za Leta bibaha inshingano zo kuba umusemburo w’iterambere, bakaba bagomba gukurikiza imihigo bahize kandi bakagira n’udushya twihariye.

Abagiye ku Rugerero bazibanda ku bikorwa byo kurwanya isuri no gufata neza ubutaka, ubukangurambaga ku kurwanya ubwandu bushya bwa Virusi itera SIDA, kwigisha kubara, gusoma no kwandika, n’ibikorwa by’isuku yo mu ngo no ku mihanda nk’uko bitangazwa n’Umuyobozi w’Akarere ka Nyamasheke Habyarimana Jean Baptiste.

Umuyobozi w’Akarere ka Nyamasheke yaboneyeho gusaba intore kwinjira muri ibyo bikorwa bakabikorana umutima n’ubwenge kugira ngo bagere ku ntego, kandi bikazabafasha no kwimenyereza umurimo no gukunda igihugu.

Umuyobozi w'akarere yasabye ababyeyi kuba hafi y'abari ku Rugerero

Yasabye ababyeyi gufatanya n’abari ku Rugerero no kubaha umwanya kugira ngo bazabashe gutanga umusaruro, kugira ngo gukorera igihugu bibe umuco ku Banyarwanda bose.

IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Location: Ndamage Building 4th floor
P.O Box: 3477 Kigali- Rwanda
Phones:
+250 788 74 29 08, +250 788 49 69 15, +250 725 94 66 08
Email:
[email protected], [email protected]

Website Developped by

Uru Rubuga Ruheruka Gushyirwaho Amakuru Mercredi 5 Février 2014 Saa 17:33:27
Copyright © 2009 -2014 - IGIHE Ltd - All Rights Reserved