IGIHE.com > Amakuru > U Rwanda
Nyamasheke :  I Karengera bibutse abagore bazize Jenoside

Nyamasheke : I Karengera bibutse abagore bazize Jenoside


Yanditswe kuya 13-04-2013 - Saa 03:34' na IGIHE

Ni ngombwa ko habaho umwihariko wo kwibuka abagore bishwe muri Jenoside yakorewe Abatutsi muri Mata 1994 kuko jenoside yabaye inzira y’umusaraba ku Batutsi bicwaga, ariko abagore n’abakobwa bakagira ububabare bw’umwihariko, aho abenshi bicwaga babanje gufatwa ku ngufu no gushinyagurirwa.

Ibi byatangajwe na Depite Mwiza Espérance kuri uyu wa Kane, tariki ya 11 Mata 2013 ubwo yifatanyaga n’abaturage b’Umurenge wa Karengera mu rwego rwo kwibuka mu buryo bw’umwihariko abagore n’abakobwa bishwe muri Jenoside yakorewe Abatutsi.

Ni ku nshuro ya gatatu, Inama y’Igihugu y’Abagore mu Murenge wa Karengera wo mu Karere ka Nyamasheke iteguye igikorwa cyo kwibuka mu buryo bw’umwihariko abagore n’abakobwa baguye mu cyahoze ari Komini Karengera.

Uyu muhango wabimuburiwe no gushyira indabo ku mva y’urwibutso rwa Jenoside rw’Umurenge wa Karengera, ndetse banunamira imibiri 206 ishyinguye muri uyu rwibutso. Abaturage bagera ku 4,500 bitabiriye uyu muhango bakomeje mu rugendo rutuje rwo kwibuka rwa kilometero 3 rwerekeza mu Kagari ka Gashashi.

Muri uru rugendo banyuze ku gasozi ka Mwiyando ko mu Mudugudu wa Nyabwinshi mu Kagari ka Miko, kaguyeho Abatutsi benshi mu gihe cya jenoside maze bahatera Igiti cy’Icyizere, nk’ikimenyetso cy’uko jenoside itazongera kuba ukundi no kubungabunga amateka yayo ; nyuma ibiganiro bikomereza mu Rwunge rw’Amashuri rwa Gashashi.

Depite Mwiza Espèrance wari waje kwifatanya n’abaturage b’uyu murenge kwibuka mu buryo bw’umwihariko abagore n’abakobwa yasobanuriye abaturage uburyo mu gihe cya jenoside, abagore n’abakobwa bagiye bakorerwa ibikorwa by’indengakamere mbere y’uko bicwa birimo gufatwa ku ngufu ndetse no gushinyagurirwa. Ibi bikaba bishingira ko abagore n’abakobwa mu busanzwe ari abanyantege nke, baba bagomba kwitabwaho nyamara bikaba atari ko byagenze mu gihe cya jenoside, kuko abicanyi bagendeye ku ntege nke zabo babica urupfu rw’agashinyaguro.

Umuhuzabikorwa w’Inama y’Igihugu y’Abagore mu Murenge wa Karengera, Nyirahirwa Fauste yavuze ko muri rusange Abanyakarengera bibuka abazize Jenoside yakorewe Abatutsi baguye mu cyahoze ari Komini Karengera.

Ubutumwa butandukanye bwatangiwe muri uyu muhango bwari ubwo kwereka abaturage ingorane zikomeye abagore bahuye na zo muri Jenoside, ariko kandi Abanyarwanda bakaba bagomba guharanira ko jenoside itakongera kubaho ukundi kandi muri byose abaturage bakarushaho gukora cyane kugira ngo babashe kwiteza imbere.

Uwingabiye Denys Basile Ushinzwe Itangazamakuru mu Karere ka Nyamasheke

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO