Nyarugenge : Kubaho neza bijyana no kugira icyiza usiga inyuma- Karugarama

Ubwo hatangizwaga ibikorwa by’urugerero n’ ukwezi kw’imiyoborere myiza, Minisitiri w’ Ubutabera akaba n’intumwa ya Guverinoma mu Karere ka Nyarugenge, Tharcisse Karugarama, yagaragaje ko kubaho neza bijyana no kugira icyiza usiga inyuma.

Kuri uyu wa kabiri intore zavuye mu itorero, urubyiruko rwarangije amashuri yisumbuye, zatangiye ibikorwa by’urugerero mu Murenge wa Mageragere aho byahuriranye no gutangiza ukwezi kw’imiyoborere myiza.

Minisitiri Karugarama yagarutse ku mateka y’amacakubiri yaranzwe mu Rwanda, aho abantu bahuriraga hamwe mu nama zigamije kwigisha amacakubiri bikageza kuri jenoside yakorewe Abatutsi mu 1994.

Minisitiri Karugarama asaba abanyarwanda gukorera igihugu bagiteza imbere hagasigara amateka meza

Karugarama yavuze ko ubu ibikorwa byo kubaka igihugu Leta irimo gukora ari ukugira ngo hazagire amateka meza asigara.

Yongeye kwibutsa izo ntore zije ku rugerero gukomeza indangagaciro na kirazira z’umuco nyarwanda mu bikorwa byabo bya burimunsi, bagaharanira guca akarengane aho kava kakagera ntihazagire umunyarwanda wongera kuzira akarere ke, ubwoko cg idini ahubwo imiyoborere myiza igakomeza kwimakazwa.

Urubyiruko rugiye gutangira urugerero