IGIHE.com > Amakuru > U Rwanda
Nyuma yo kubazwa byinshi, Yolanda Mukagasana aratanga ibisubizo

Nyuma yo kubazwa byinshi, Yolanda Mukagasana aratanga ibisubizo


Yanditswe kuya 30-01-2013 - Saa 17:20' na Karirima A. Ngarambe

Mu minsi ishize mu kiganiro twagiranye n’umwanditsi w’ibitabo Mukagasana Yolande ku byerekeye ihabwa rye ry’igihembo bise « Prix international de la Paix » bamwe mu basomyi bacu baramwandikiye, ahitamo kubasubiza atanze ubutumwa bwe mu gitangazamakuru IGIHE batanzemo ubuhamya n’ibitekerezo byabo.

Dore ibisubizo yabahaye:

Ku babajije niba babona ibitabo yanditse mu rurimi rw’ikinyarwanda abasubiza agira ati «Ibyerekeranye n’ibitabo nanditse, nta na kimwe kiri mu kinyarwanda. Impamvu nanditse mu gifaransa, si uko nanga ururimi rwanjye cyangwa ntaruzi.

Nifuzaga ko abanyamahanga, cyane cyane abavuga igifaransa bibonera ibyo abayobozi babo badukoreye, cyane cyane Ubufaransa. Ndetse nkimara kucyandika, Abafaransa baranyikoreye, ariko bamwe mu baturage babo baranshyigikiye, ahubwo bituma havuka n’amashyirahamwe yamfashije kurwanira kumenyekanisha ko u Bufaransa bufite uruhare rukomeye muri Jenoside yakorewe Abatutsi mu Rwanda.

Ngiyo impamvu nyamukuru kitanditswe mu kinyarwanda, ahubwo bimwe byahinduwe mu zindi ndimi, uwabishaka wese yabihindura mu Kinyarwanda, cyane cyane inzobere mu rurimi rwacu kuko mbifitiye uburenganzira kandi nanjye nabubaha.

Hari uwabajije Mukagasana niba ajya yibuka uwamuhishe muri Jenoside, yamusubije agira ati « naramushimiye mu mwaka wa 1998, aho yabiherewe n’igihembo. Nkora n’ibishoboka byose agatumirwa mu nama zibera mu mahanga zerekana ubutwari bw’abahishe abandi, nk’Abahutu bahishe Abatutsi muri jenoside. Yageze inshuro nyinshi mu Butaliyani, bamutereye igiti bise « le Juste parmi les Nations Padova » yigeze no kujya gutanga ubuhamya mu Bubiligi.»

Mukagasana akomeza agira ati «Hari uwavuze ko natumye akunda Abasesero. Nanjye ndabakunda cyane nuko ntabona icyo mbaha. Burya hari ikintu nshobora kuba ntumvikanaho na benshi, ni ijambo ubutwari muri Jenoside. Ese kuki ubutwari bwaba ubw’Abahutu bakijije Abatutsi gusa, ntitwumve ko Bisesero ari intwari kimwe n’abandi nka Bugesera, Mwurire, hagomba kuba hari n’abandi tutaramenya. Abagombaga kwicwa birwanyeho kugeza ubwo Leta yakoze Jenoside itera inkunga Interahamwe. N’ubwo abo birwanyeho bose batashoboye kurokoka, ubwo twabita iki kindi kitali intwari.

Ese Birara washyize Abasesero kuri gahunda yo kwirwanaho, akarwana urwo rugamba kugeza bamwishe ntabwo yari intwari? Ese Front Patriotique yahagaritse Jenoside si intwari ?

Hari uwavuze ko ngo nababaye cyane , oya ahubwo nibara mu bagize amahirwe atavugwa. Naho kuba narabereye bamwe urugero rwo kwiyubaka, kubimbwira biranshimishije cyane, ni yo mpamvu kwandika ari byiza mukomeze kandi tugirane inama uko twarushaho kubigeraho.

Abacitse ku icumu twese tukaba igisubizo cy’igihugu, aho kukibera ikibazo. Ndabibasaba kandi nkomeje. Dufatanye, dufashe abatarashobora kwiyubaka biyubake. Ariko kandi simbisaba abacitse ku icumu gusa. Ubundi yakabaye inshingano ya muri Munyarwanda ukunda u Rwanda.

N’ubwo Jenoside yakorewe Abatutsi, ntawe itagizeho ingaruka. Kubona na n’ubu hari Abanyarwanda batataha ngo batarangije akazi (Jenoside). Abacitse ku icumu bo bamenye ko ngo umugabo yigira yakwibura agapfa. Ntitugomba gutegereza utwubaka, tugomba natwe kubigiramo uruhare. Abacu aho bari babone ko twasigaye tukaba intwari, tukibeshaho, imfubyi zikirera, abapfakazi bakaba abagabo n’ibindi. Uwo tubonana intege nke tumufashe uko dushoboye, agwe tumuhagurutse, ananirwe kugenda tumukurure.

Ndi source d’inspiration ku bato? Muranshinyagurira. Ukuntu nkunda urubyiruko, nanjye ni rwo runyubaka kuko rumpa icyizere cy’ejo hazaza heza. Nsanze ari byo nakwishima cyane rwose! Niba rero ariko bimeze,
Mukurangiza mbisabire ikintu kimwe; nimwandike amateka yanyu kuko iyo yanditwe n’abandi ntibayavuga neza uko ari nka nyirayo, kandi mbibutse ko aya mateka nimuyandika ari yo abana bacu baziga mu mashuri bikazabaha kumenya uko bitwara mu mahoro mu minsi iri imbere.

Ibyo kubura Inyumba byo biri ukwabyo, kuko kuri jye no kumwita intwari ntibihagije, sinzi inyito namubonera. Kandi kuba tutaranabimubwiye bihagije

Nongeye kubashimira rero, tugire umutima w,urukundo, dufashe bagenzibacu barokotse jenoside tubabe hafi kuko badukeneye. Tumenye kwicarana nabo tubatege amatwi, tureke kubacira urubanza.

Ubundi nongere nsabe urubyiruko ko rugomba kwitandukanya n’ikibi cyose maze maze mushimishwe no kwitwa Abanyarwanda.

Mugire amahoro"

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO