IGIHE.com > Amakuru > U Rwanda
Perezida Kagame arizeza ubufatanye mu iterambere n’abaturage ba Nyamagabe

Perezida Kagame arizeza ubufatanye mu iterambere n’abaturage ba Nyamagabe


Yanditswe kuya 19-02-2013 - Saa 14:34' na Olivier Rubibi

Ubwo kuri uyu wa kabiri tariki ta 19 Gashyantare 2013 Perezida Paul Kagame yasuraga Akarere ka Nyamagabe, yijeje abatuye aka karere ubufasha bwose bushoboka mu rugamba rw’iterambere.

Perezida Kagame yabitangarije mu Kagari ka Munini mu Murenge wa Buruhukiro wo muri aka karere k’Intara y’Amajyepfo.

Imvura yaguye muri aka gace ntiyabujije Perezida Kagame kuganira n’abaturage, abashimira uburyo bakomeje kwiteza imbere. Yagize ati “Aho Nyamagabe ivuye n’aho igeze ni ikimenyetso cy’ibishoboka, cy’aho abantu bashobora kwivana n’aho bashobora kwigeza. Leta ifatanya namwe ikabatera inkunga ariko ibyinshi ni mwebwe mubikora. Dufatanye twese dukore ibishobora kuduteza imbere, ibyiza biri imbere kandi turabikozaho imitwe y’intoki. Ariko byose biradusaba imbaraga. Bisaba gukora tugashyira hamwe, tugashyira mu gaciro tukiha agaciro tukubaka igihugu cyacu Imana yaduhaye.”

Perezida Kagame yakomeje abwira aba baturage ko bakwiye gukoresha imbaraga bafite, ati “Dukoreshe imbaraga zacu n’ubwenge bwacu twubake u Rwanda. Buri Munyarwanda wese afite uruhare mu guteza imbere igihugu. Turashaka ko Abanyarwanda bagira ubuzima bwiza, turashaka ko Abanyarwanda baba abakozi. Nazanywe hano no kubasura nkabasuhuza kandi ndagira ngo mbasezeranye ko icyo muzajya mukenera cyose muzajya mugihabwa. Ndabibutsa ko icya ngombwa ari ugufatanya tugashyira hamwe tugakora. Nzagaruka dusangire ibyo mwejeje!”

Mbere yo kuganira n’abaturage Perezida Kagame yabanje gusura uruganda rutunganya icyayi ruri kubakwa muri aka karere, uruganda ruzatwara miliyoni umunani z’amadolari ya Amerika.

Akarere ka Nyamagabe ni Akarere kakunze kurangwa n’ubukene mu minsi yashize, ariko ubu ngo ibi bisigaye ari nk’umugani kuko abagatuye bahagurukiye gukora bakarwanya aya mateka mabi.

Perezida Kagame azakomereza uruzinduko rwe kuri uyu wa gatatu Karere ka Nyaruguru gahana imbibi n’aka Nyamagabe.

Perezida Kagame asuhuza Abaturage ba Nyamagabe
Abaturage ba Nyamagabe bagaragarije ibyishimo Perezida Kagame
Byari ibyishimo byinshi by'uko Perezida Kagame yabasuye
Imisozi ya Nyamagabe aho Perezida Kagame yaganiririye n'abaturage
Perezida Kagame aganira n'abaturage b'Akarere ka Nyamagabe
Beretse Umukuru w'Igihugu ibyo bakora
Perezida Kagame areba ibyo abaturage ba Nyamagabe bakora
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO