IGIHE.com > Amakuru > U Rwanda
Perezida Kagame mu ’Bukangurambaga kuri miliyoni y’abajyanama b’ubuzima’

Perezida Kagame mu ’Bukangurambaga kuri miliyoni y’abajyanama b’ubuzima’


Yanditswe kuya 25-01-2013 - Saa 09:02' na IGIHE

Kuri uyu wa kane tariki ya 24 Mutarama 2013, Perezida Paul Kagame uri i Davos mu Busuwisi ahateraniye Ihuriro ry’Ubukungu ku isi yifatanyije n’abayobozi b’ibigo bikomeye ku rwego rw’isi mu gutangiza igikorwa cy’ubukangurambaga cyiswe "One Million Community Health Workers Campaign", ugenekereje mu Kinyarwanda bishatse gusobanura "Ubukangurambaga kuri miliyoni y’abajyanama b’ubuzima".

Iki gikorwa cyatangijwe ku mugaragaro na Perezida Kagame ari kumwe n’Umuyobozi w’uruganda Novartis rwa kabiri ku isi mu gukora imiti Joseph Jimenez, ndetse na Jeffrey Sachs ukuriye ikigo Earth Institute cyo kongera umubare w’abajyanama b’ubuzima ku mugabane wa Afurika.

Perezida Kagame atanga ikiganiro ku bitabiriye ihuriro ry'ubukungu ku isi

Imirimo yo gukurikirana ishyirwa mu bikorwa ry’ubu bukangurambaga izakurikiranwa na komite y’agateganyo ikorera mu kigo cy’ubushakashatsi cyitwa Earth Institute hamwe na Loni.

Agaragaza uko yakiriye iki gikorwa cy’ubukangurambaga, Perezida Kagame yagize ati "Nka Perezida w’u Rwanda nkaba n’umwe mu bayoboye itsinda rikora ubuvugizi ku ntego z’ikinyagihumbi z’iterambere na komosiyo ya UNESCO yo gukora ubuvugizi ku muyoboro mugari (broadband) hagamijwe iterambere, nshyigikiye byimazeyo iki gikorwa cy’ubukangurambaga hagamijwe kubona miliyoni y’abajyanama b’ubuzima bazateza imbere ibungabungwa ry’ubuzima bw’abaturage muri Afurika.”

Perezida Kagame n'abo bari kumwe mu Ihuriro ry'Ubukungu ku isi

Perezida Kagame yongeyho ati “Mu Rwanda twabonye ubushobozi bw’abajyanama b’ubuzima mu kuvugurura ubuzima, kandi twizera ko iyi ntambwe yafasha urwego rw’ubuzima muri Afurika. Iki gikorwa kizafasha mu bufatanye bwinshi bw’abigenga n’inzego za leta, gahunda za Loni n’iza Afurika Yunze Ubumwe kugira ngo hagerwe ku ntego z’ikinyagihumbi mu bijyanye n’ubuzima.”

Perezida Kagame yagaragaje uko Abajyanama b'ubuzima bafashije umuryango nyarwanda

Umukuru w’Igihugu cy’u Rwanda yavuze ko ubu u Rwanda rumaze guhugura abajyanama b’ubuzima ibihumbi 47, kugeza ubu bakaba bari mu bice byose by’igihugu.

Ati “Twanakoresheje ibikoresho by’ikoranabuhanga tuvugurura umusaruro w’abajyanama b’ubuzima. Kugira abajyanama b’ubuzima ni ibintu dufitemo uburambe, kandi twabonye umusaruro wabyo mwiza. Turenze kuba twishimye kuko dukoresha ubu buryo atari uko gusa budufasha, ahubwo kuko binafasha abatuye Afurika.”

Uruganda Novartis rwemeye gutanga inkunga

Muri iki gikorwa cy’ubukangurambaga, umuyobozi w’uruganda Norvatis, Joseph Jimenez, yemeye ko azatanga miliyoni y’amadolari ya Amerika yo gufasha mu mahugurwa n’iterambere by’abakangurambaga b’ubuzima.

Ku mugabane wa Afurika bari ku ijanisha ry’10% bapfa bakiri munsi y’imyaka itanu. Ikindi ni uko imfu z’ababyeyi b’abagore zikiri ku gipimo cyo hejuru, ugasanga kandi abantu benshi kuri uyu mugabane bapfa bazize indwara zishobora kwirindwa nka malariya, impiswi na virusi itera SIDA.

Ibi ni byo Jeffrey Sachs ukuriye ikigo cyo kongera umubare w’abajyanama b’ubuzima muri Afurika yahereyeho, ati “Ubukangurambaga buzahindura uko abantu bitaga ku buzima kuri uyu mugabane, bunafashe bimwe mu bihugu bikennye ku isi kugera ku ntego z’ikinyagihumbi zijyanye n’ubuzima.” Yongeyeho ati “Dutewe ishema no gukorana na Norvatis mu gutangiza ubu bukangurambaga no gukorana n’abayobozi ba Afurika mu guteza imbere imikorere y’abajyanama b’ubuzima mu kugera ku baturage bo hasi mu biturage.”

Gahunda z’abajyanama b’ubuzima mu Rwanda zimaze iminsi zikora kandi hari ibyo zakemuye binyuze muri gahunda igihugu n’abaterankunga bafite ku buzima. Aba bajyanama kandi batanga ubuvuzi bw’ibanze n’inama ku bo baturanye, bigatuma indwara zazahazaga umuryango nyarwanda ubu zitakigaragaza ubukana bukomeye nka mbere.

Mu Rwanda abajyanama b'ubuzima batanga inama kandi bakavura indwara zoroheje ku muryango nyarwanda

Ubu bukangurambaga bwatangijwe kuri uyu wa kane buzakorwa na za guverinoma n’ibigo bitegamiye kuri leta, mu gutera inkunga y’amafaranga n’amahugurwa abajyanama b’ubuzima.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO