Perezida wa Repubulika Paul Kagame yabonanye n’Abanyeshuri 100 b’Abanyarwanda biga i Beijing mu gihugu cy’u Bushinwa, ku itariki ya 15 Nzeri 2012, ashimira inkunga bashyize muri AgDF.
Kugeza ubu Abanyarwanda batuye mu mijyi 19 itandukanye y’u Bushinwa barenga 300. Perezida w’abanyeshuri b’Abanyarwanda biga mu Bushinwa, Nshunguyimfura Victor yanyuzemo muri make ibyo bamaze kugeraho, n’ibyo bateganya mu minsi mike iri imbere.
Nk’uko tubikesha The New Times, Nshunguyimfura yaravuze ati "Ihuriro ryacu ryatanze amadorali y’Amerika 5000 mu kigega Agaciro, kandi na twa twatangije itorero.”
Yongeyeho ati ”Turashimira Kagame ku gaciro yaduhesheje, ubu kwitwa Abanyarwanda bidutera ishema.”
Nshunguyimfura yavuze ko aho bagiye hose usanga bamenyekanisha igihugu, ati ”Igihugu kirangwa no kwihesha agaciro, ubumwe, no gusenyera umugozi umwe.”
Amashami atandukanye aba banyeshuri biga mu Bushinwa bigamo yiganjemo iby’inyubako zo mu rwego rwo hejuru, ikoranabuhanga, icungamari n’ubukungu.
Perezida Paul Kagame yarababwiye ati ”Umwanya muri mu Bushinwa ubabere uw’intego nziza, kandi inyungu muzahakura mureke ziteze u Rwanda imbere.”
Yongeyeho ati ”Ntimube hano ari uguta igihe gusa kuko byabagora kugarura amahirwe mwaba mwivukije.”
Kagame yongeyeho ati ”Ni mwe mufite uruhare rwo guhindura u Rwanda no kuruteza imbere bitewe n’ubumenyi muzakura hano.”
Yongeyeho ati ”Nta wundi uzabibakorera uretse guteza imbere igihugu muhereye ku byo mwize mu mahanga.”
Perezida Kagame kandi yashimiye ubwitange bwabo banyeshuri batanze amafaranga mu kigega Agaciro.
Kagame yarababwiye ati ”Icy’ibanze si amafaranga menshi, ahubwo ubushake bwo guteza iguhugu imbere ni cyo cy’ingenzi”.
Yagereranyije gutega inkunga ku mahanga n’abantu basabiriza ku muhanda, avuga ko abatega amaboko nta gaciro bahabwa.
Yasoje avuga ati ”Tugomba gucika ku mfashanyo nk’uko umunyeshuri arangiza Kaminuza akajya kwirwanaho.”
IKINYARWANDA
IKIRUNDI
ENGLISH
FRANÇAIS
Ahabanza
Abo Turibo
Serivisi
Twandikire
Ibirimo
