Radiyo Inteko yashyizwe mu maboko ya ORINFOR

Radiyo y’Inteko Ishinga Amategeko, Radiyo Inteko, kuri uyu wa mbere yeguriwe ikigo cy’igihugu cy’itangazamakuru ORINFOR.

Umuhango wo gusinya amasezerano yegurira ORINFOR Radio Inteko wabereye ku Kimihurura mu ngoro y’inteko ishingamategeko, umutwe wa Sena. Abanyamabanga bakuru bo mu mitwe yombi y’Inteko, Cyitatire Sosthène na Mukarurangwa Immaculé nibo basinye ku masezerano yegurira ORINFOR radio inteko. ORINFOR yo yari ihagarariwe n’umuyobozi mukuru wayo w’agateganyo, Willy Rukundo.

Kwegurira iyi Radio ORINFOR byasabwe n’umukuru w’igihugu mu kiganiro aheruka kugirana n’abanyamakuru, asaba inzego bireba kubyihutisha kugira ngo inzego za Leta zo kugira amaradiyo atandukanye. Nk’uko byasobanuwe na Perezida w’Inteko Ishinga Amategeko umutwe wa Sena, Dr Jean Damascène Ntawukuriryayo, amasezerano yasinywe kuri uyu wa mbere ni ay’igihe gitoya ajyanye n’ingengo y’imari.

Hasinywa amasezerano yo kwimura Radiyo Inteko muri ORINFOR

Dr Ntawukuriryayo yasobanuye ko muri Kamena uyu mwaka aribwo ibikorwa byose bya Radio Inteko bizegurirwa ikigo gishya cya Leta cy’itangazamakuru Rwanda Broadcasting Agency.

Rradiyo Inteko intego yayo ni ukumenyekanisha no kugeza ku banyarwanda ibikorwa by’Inteko.

Minisitiri w’ubutegetsi bw’igihugu, James Musoni, unafite itangazamakuru mu nshingano ze, yatangaje ko kuba iyi radiyo yeguriwe ORINFOR bizatuma intego yayo irushaho kugerwaho.

Umuyobozi mukuru w’agateganyo wa ORINFOR, Willy Rukundo, we avuga ko gushyikirizwa Radio Inteko bizatuma harushaho kunozwa umuyoboro w’itumanaho hagati y’abaturage n’abayobozi babo.

Kuri ubu ikigo cy’igihugu cy’itangazamakuru gifite radio ndwi ; umuyobozi w’agateganyo wa ORINFOR akaba avuga ko kuba hiyongereyeho na radio inteko yahinduriwe izina ikitwa Radiyo Rwanda Inteko, nta mbogamizi biteye mu rwego rw’abakozi, kuko radio Inteko isanganywe abakozi bayo.