IGIHE.com > Amakuru > U Rwanda
RRA yongeye gutsindwa mu rubanza iregwamo n’Umunyapakistani (Updated)

RRA yongeye gutsindwa mu rubanza iregwamo n’Umunyapakistani (Updated)


Yanditswe kuya 13-11-2012 - Saa 06:31'

Mu cyumweru gishize Urukiko Rukuru rw’Ubucuruzi rwemeje ko Ikigo cy’Imisoro n’Amahoro (RRA) cyagennye umusoro w’umurengera kuri sosiyete Garibsons mu buryo bunyuranye n’amategeko.

RRA yasoresheje umushoramari w’Umunyapakistani winjiza umuceri mu Rwanda amadorali 386 kuri toni kandi yaragombaga gusoreshwa amadolari 170 kuri toni nkuko umwanzuro w’Urukiko Rukuru rw’Ubucuruzi ubyerekana.

“Urukiko rusanze ko RRA idasobanura impamvu yasimbutse izindi ntambwe zigomba gukoreshwa mbere yo kugera ku ntambwe ya Fall back value yakoresheje, yewe ntinagaragaza ko yakoresheje izindi ntambwe ariko igiciro (Custom value) nticyabashije kuboneka. Rusanze kandi ko RRA itakoresheje uburyo bukurikije amategeko mu kugena igiciro cy’umuceri wa Garibsons commodities Central Africa Ltd wageze muri gasutamo ku 03/08/2012,…”

Uru rubanza rwashojwe mu Rukiko Rukuru rw’Ubucuruzi mu gihe hari hashize amezi hafi icumi urubanza bifitanye isano rusojwe mu Rukiko rw’Ikirenga ariko urubanza ntirwarangizwa.

Nyuma yaho umushoramari yatsindiye Ikigo cy’Imisoro n’Amahoro ndetse kigategekwa kwishyura amafaranga y’umusoro w’umurengera cyaciye umushoramari, RRA ntiyubahirije ibyemezo by’urukiko bituma umushoramari yitabaza inzego za Leta harimo ibiro by’Umukuru w’igihugu.

Ibi byatumye umushoramari yitabaza inkiko nazo zemeza ko agomba gusora amadorali 170 kuri toni kandi ko Ikigo cy’Imisoro n’Amahoro nta shingiro gifite cyo kumuca imisoro y’ikirenga nk’uko ikinyamakuru Izuba Rirashe kibikesha inyandiko z’Urukiko rw’Ikirenga gifitiye kopi; ndetse urukiko rutegeka ko uyu mushoramari asubizwa imisoro y’ikirenga yatanze ingana na 212,850,511 Rwf.

Ikigo cy’Imisoro n’Amahoro cyasabye ko urubanza rwari rwasojwe n’Urukiko rw’Ikirenga rwasubirwamo kuko habonetse izindi ngingo nshya, kuko nyuma y’icibwa ry’urubanza hagaragaye ibimenyetso bishimangira ko igiciro cy’umuceri wa Garibsons atari amadolari 170 kuri toni nkuko babivuga.

Urubanza rwa RRA na Sosiyete y’Abanyapakisitani rwageze no mu biro by’Umukuru w’Igihugu

Nyuma y’aho umushoramari yatsindiye Ikigo cy’Igihugu cy’Imisoro n’Amahoro ndetse kigategekwa kwishyura amafaranga y’umusoro w’umurengera cyaciye umushoramari, RRA ntiyigeze ishyira mu bikorwa ibyo yari yategetswe n’urukiko ibi bikaba byaratumye umushoramari yitabaza inzego za Leta harimo ibiro by’Umukuru w’igihugu.

Ibaruwa yandikiwe Garibsons commodities Central Africa Ltd IGIHE ifitiye kopi, igaragaza ko ibiro by’umukuru w’igihugu byasabye Minisiteri y’Imari n’Igenamigambi (MINECOFIN) gufasha iyi kompanyi igahabwa amafaranga yatsindiye mu Rukiko rw’Ikirenga. Iyi baruwa yanditswe na Minisitiri mu biro bya Perezida wa Repubulika y’u Rwanda.

Nyuma yo kubona igihe uru rupapuro rumaze rusaba ko Garibsons commodities Central Africa Ltd yakwishyurwa twabajije muri Minisiteri y’imari n’igenamigambi icyatumye badafata umwanzuro ngo Garibsons commodities ihabwe ibyo yatsindiye mu nkiko, Kampeta Sayinzoga, umunyamabanga uhoraho muri MINECOFIN avuga ko bari barategereje imyanzuro y’urukiko. Ati “Imyanzuro y’urukiko nimara kugaragara tuzatanga ubufasha.”

Biteganyijwe ko urubanza ruzasubirishwamo taliki 20 Ugushyingo 2012.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO