IGIHE.com > Amakuru > U Rwanda
Rulindo: Hatangijwe ukwezi kw’imiyoborere myiza n’Urugerero

Rulindo: Hatangijwe ukwezi kw’imiyoborere myiza n’Urugerero


Yanditswe kuya 23-01-2013 - Saa 16:19' na Richard Irakoze

Visi perezida w’Inteko Ishinga Amategeko y’u Rwanda umutwe w’abadepite Kalisa Evariste, mu muhango wabereye mu murenge wa Cyungo wo mu karere ka Rulindo yatangije ku ya 22 Mutarama 2013 ukwezi kw’imiyoborere myiza ku rwego rw’igihugu; hamwe n’itorero ku banyeshuri barangije amashuri yisumbuye mu mwaka wa 2012.

Uyu muhango wahujwe no gutangiza gahunda y’Urugerero ku banyeshuri barangije amashuri yisumbuye, bihuzwa kandi no kwizihiza umunsi mpuzamahanga wo kurwanya SIDA usanzwe wizihizwa ku itariki ya mbere Ukuboza.

Kalisa yavuze ko imbogamizi y’imiyoborere myiza mu Rwanda na Afurika yakunze kuba ubukene. Yashimye ko ubu hari intambwe iri guterwa, by’umwihariko Akarere ka Rulindo agashimira kuba karakomeje kuza ku isonga mu ngeri nyinshi z’imihigo; asaba abaturage kurushaho gukora bakarwanya ubukene kugira ngo babashe kwiteza imbere.

Yijeje abaturage ko Leta y’u Rwanda yashatse inzira nyayo yo kwikemurira ibibazo ubwayo, ati “Ntahabura kidobya, abamenyereye guteza amacakubiri mu Banyafurika ejo bundi bafashe imyanzuro ngo batuvaniyeho imfashanyo baduhaga, ariko basanze twariteguye.”

Umuyobozi w’Akarere ka Rulindo Kangwagye Justus, yagarutse yerekanye ko akarere ka Rulindo gakataje mu miyoborere myiza anagaragaza ko kagenda karushaho kwesa imihigo.

Kangwagye yavuze ko hari ibyagezweho, atanga urugero ko Umurenge wa Kinzuzi wahawe amashanyarazi hubakwa n’imihanda, ibiraro; kandi ngo hubatswe ibiro bishya by’imirenge hanubakwa inzu y’ubukerarugendo. Yavuze ko hanahuguwe abaturage 300 bagiye guhugura utundi turere mu gukora amaterasi y’indinganire, guhangira imirimo abaturage n’ibindi.

Mu biteganywa, umuyobozi w’Akarere yagize ati “Turashaka ko Akarere ka Rulindo kaba aka mbere mu gushaka amafaranga, kuyamenya, kuyakoresha no kuyacunga. Ubumenyi bwa gatatu dushaka ni ubumenyi n’ikoranabuhanga.”

Muri ibi birori umuhanzi Senderi International Hit yasusurukije abaturage, abakangurira kwisuzumisha no kwipimisha virusi itera SIDA.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO