IGIHE.com > Amakuru > U Rwanda
Rusizi : Ubufatanye bw’Ubuyobozi n’Abikorera nk’imwe mu nzira yo kwihutisha iterambere

Rusizi : Ubufatanye bw’Ubuyobozi n’Abikorera nk’imwe mu nzira yo kwihutisha iterambere


Yanditswe kuya 20-11-2012 - Saa 11:00' na Jean Pierre Niyibizi

Ibi byavugiwe mu nama nyunguranabitekerezo yabaye kuri uyu wa 19/11/2012, ihuje Umuyobozi w’Akarere ka Rusizi, Umuyobozi w’Ingabo muri Rusizi na Nyamasheke Col n’Umuyobozi wa Polisi mu Karere ka Rusizi.

Aba bayobozi bagiranye inama n’abacuruzi bo mu byiciro binyuranye, abanyamabanki, abanyamahoteri ndetse n’ubuyobozi bw’urugaga rw’abikorera hagaragazwa ibibazo biri mu bucuruzi mu Karere ka Rusizi ndetse n’icyakorwa ngo ubucuruzi buhakorerwa butere imbere.

MUmuyobozi w’Akarere ka Rusizi, Nzeyimana Oscar, yagaragaje ko iterambere ry’igihugu ndetse n’iry’akarere by’umwihariko ritazazanwa n’abanyamahanga, ko ahubwo abakorera mu gace aka n’aka, aribo bagomba gufata iyambere mu kugira uruhare mu bikorwa bibazamura n’Akarere muri Rusange.

Nk’uko byavugiwe muri iyi nama, ngo mu byo abacuruzi bagomba kwitwararika harimo kwita ku mutekano w’aho bakorera, gutanga amakuru arebana n’ibyahungabanya umutekano ku gihe, gukorana neza n’inkeragutabara kandi umusanzu wazo ugatangirwa igihe, kubaha inzego z’ubuyobozi ku bigendana no gushyira mu bikorwa gahunda za Leta, kunoza uburyo bwo kugenzura umutekano aho bakorera hubahirizwa amabwiriza yo gushyira ibyuma bifasha kugenzura umutekano ahakorerwa imirimo rusange no kwiga uburyo bw’ishoramari rishya aho guheranwa n’ubucuruzi bukorerwa mu maduka gusa.

Mu bibazo byagaragajwe n’abacuruzi b’i Kamembe harimo ibijyanye n’uko abanyamabanki babima inguzanyo bakabarerega ; ibi bikagira ingaruka yo gukererwa kw’ishyirwa mu bikorwa ry’imishinga baba bateguye.

Umuyobozi wa Banki nkuru y’u Rwanda ishami rya Rusizi Mirindi Johnson, yavuze ko nta mabwiriza yahawe amabanki abasaba kwimana inguzanyo, icyakora na we anenga abacuruzi avuga ko benshi basigaye babika amafaranga aho bakorera aho kuyabika muri Banki, ibyo bikagaragazwa n’uko abenshi basigaye bafite imitamenwa aho bakorera.

N’ubwo umujyi wa Rusizi ugenda utera imbere umunsi ku munsi, abacuruzi b’i Kamembe barasabwa no gushora imari mu iyubakwa ry’amahoteli kuko kugeza ubu ari urwego rukiri hasi cyane ndetse no mu burezi mu rwego rwo gufasha abanyeshuri barenga 2500 bambuka buri gihe bagiye kwiga i Bukavu muri Congo.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO