IGIHE.com > Amakuru > U Rwanda
Tuganemariya Placidia yabyaye umwana amuta mu musarani

Tuganemariya Placidia yabyaye umwana amuta mu musarani


Yanditswe kuya 23-01-2013 - Saa 09:29' na Umurerwa Emma-Marie

Ku munsi w’ejo ahagana saa kumi z’amanywa, uwitwa Tuganemariya Placidia yabyaye umwana amuta mu musarani ahita apfa.

Uyu mukobwa wakoraga akazi ko mu rugo mu mudugudu wa Marembo, Umurenge wa Gatsata mu Karere ka Gasabo, yabyaye umwana w’amezi arindwi ahita amuta mu musarani w’umuturanyi.

Uwamariya Claudine wamukoreshaga yadutangarije ko uyu mukozi bari bamaranye iminsi 20, akaba yaramurangiwe na se wabo [w’umukozi].

Asobanura uko Tuganemariya yabigenje, Uwariya ati ”Nari mfite umwana urwaye kandi ngomba kujya ku kazi. Naraye mubwiye ngo abyuke kare amunjyanire kwa muganga, mu gitondo ndamubyutsa ariko mbona ameze nk’ufite ikibazo mubaza uko ameze, ambwira ko yumva arwaye umutwe ariko atari cyane.”

Yakomeje avuga ko mu minsi bari bamaranye atari azi ko atwite.

Tuganemariya ngo yageze ku muhanda wa kaburimbo aho bita Kanyonyomba ajyana umwana aho se wabo acucuriza, amusaba kumumusigaranira akabanza akajya kugura ibinini by’umutwe.

Avuye kubigura ngo yahise amanuka ku rugo ruri hafi y’igishanga cya Kanyonyomba, ahasanga abana bato bari mu rugo abasaba ko bamutiza ubwiherero.

Avuye mu bwiherero yasohotse yihuta, abana bagarutse hanze ngo bumva agahinja kurira ariko bayoberwa aho karirira babibwira nyirakuru na we asohotse arakumva ariko ngo ntiyamenya ibyo ari byo.

Tuganemariya ngo asubiye aho yasize umwana inzira yose yagiye ayitamo amaraso, abamubonye bakamwibazaho.

Nyuma abandi bantu bagiye gutira ubwiherero muri rwa rugo, basanga amaraso yuzuye hejuru yabwo. Ni ko kubaza ba nyir’urugo umuntu uvuyemo baramukurikirana, basanga ageze hamwe yasize umwana.

Mu gihe abaturage bamuhataga ibibazo, Tuganemariya yavuze ko afata imiti yo kuringaniza urubyaro ikaba yamuguye nabi ikamutera kuva.

Abaturage ntibamushize amakenga, ni ko guhamagara abashinzwe umutekano. Bahageze ngo yahise yemera ko yabyaye umwana w’amezi arindwi agahita amuta mu musarani.

Umunyamabanga Nshingwabikorwa w’Umurenge wa Gatsata Kabanda Joseph, yatangarije IGIHE ko ibikorwa nk’ibyo bitari bisanzwe biba muri uwo murenge ariko ko hari undi mukozi wo mu rugo abaturage bigeze gukeka ko yabyaye agata umwana mu musarani bajya kumushaka bamuburamo.

Tuganemariya Placidia ukomoka mu Karere ka Ngororero mu Murenge wa Gatumba ubu ari mu maboko ya Polisi, ariko yabanje kujyanwa kwa muganga mu bitaro bya Polisi biri ku Kacyiru.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO