U Bufaransa bwasoje iperereza ku ndege ya Habyarimana

Yanditswe na IGIHE
Kuya 21 Ukuboza 2017 saa 03:20
Yasuwe :
2 0

Abacamanza b’u Bufaransa bashinzwe gukora iperereza ku byaha by’iterabwoba, basoje iperereza ku ihanurwa ry’indege ya Habyarimana wayoboye u Rwanda, ryari rimaze imyaka igera kuri 19.

Ihanurwa ry’indege ya Habyarimana rimaze igihe ryarashyize igitotsi mu mubano w’u Rwanda n’u Bufaransa.

Ibiro Ntaramakuru by’Abafaransa, AFP, byatangaje ko iri perereza ryahagaritswe kuri uyu wa Gatatu.

Jeune Afrique yo yanditse ko umwe mu bayobozi bakuru b’u Rwanda yahamije ibijyanye n’ifungwa ry’iyi dosiye.

Bivugwa ko ubu igisigaye ari uko Ubushinjacyaha bw’u Bufaransa bukuraho burundu ibirego bwashyiriyeho abayobozi bakuru barindwi b’u Rwanda cyangwa hagatangizwa urubanza kuri bo.

Si ubwa mbere u Bufaransa buhagaritse iperereza kuri iyi ndege. Uko ryasubikwaga, hashiraga igihe rikongera gusubukurwa bikozwe n’abandi bacamanza.

Uku gusubikwa no gusubukurwa ni ibintu byakunze gufatwa nko gushaka guhishira uruhare u Bufaransa bwagize muri Jenoside yakorewe Abatutsi.

Umucamanza Jean Louis Bruguière ni we watangije ikiswe iperereza, yakoze adakandagiye ku butuka bw’u Rwanda, ariherekeresha impapuro zita muri yombi bamwe mu basirikare bakuru b’u Rwanda bagize uruhare mu rugamba rwo guhagarika Jenoside.

Nyuma muri Nzeri 2010, abacamanza babiri Nathalie Poux na Marc Trevedic baje mu Rwanda mu iperereza ku ihanurwa ry’iyi ndege, bagira n’umwanya wo kumva ubuhamya bw’abantu batandukanye yaba abari mu Rwanda no mu Burundi, nyuma banzura ko iyi ndege yahanuwe n’agatsiko k’intagondwa z’Abahutu zitakozwaga iby’isaraganya ry’ubutegetsi.

Mu myaka ushize wa 2016, Umucamanza Jean-Marc Herbaut na Nathalie Poux bongeye kugaruka kuri iri perereza, batangira baha umwanya bamwe mu barwanya ubutegetsi bw’u Rwanda nk’abatangabuhamya bakunze kurangwa no kunyuranya imvugo.

Soma: Ugusobanya imvugo mu batangabuhamya mu iperereza ku wahanuye indege ya Habyarimana

Nyuma y’ubu buhamya, aba bacamanza bahise batumiza Minisitiri w’Ingabo z’u Rwanda, Gen. James Kabarebe, kugira ngo azajye kwisobanura; gusa mu minsi ishize abunganizi be bavuze ko umukiliya wabo adashobora kwitaba ngo asobanure ku buhamya budafite ishingiro.

Bagize bati “Ni ibintu bidashoboka kumva ko Minisitiri w’Ingabo uri mu mirimo yajya mu Bufaransa kwisobanura ku muntu na we utavugwaho rumwe.”

Perezida Kagame ubwo yagezaga ijambo ku bacamanza mu muhango wo gutangiza ku mugaragaro Umwaka w’Ubucamanza wa 2016/2017, wabaye tariki 10 Ukwakira 2016, yavuze ko u Rwanda ntacyo rutakoze kugira ngo rworohereze abashaka gukora iperereza kuri iyi ndege by’umwihariko Abafaransa.

Icyo gihe yagize ati “Twashakaga gukemura iki kibazo, kugira umubano mwiza. Twaritanze ubwacu tuti muze hano mugire amakuru ku byo mushaka. Dutanga uburenganzira kuri buri kimwe cyose aba bantu bashaka.”

Perezida Kagame icyo gihe yanavuze ko u Bufaransa bwari bukwiye kuba bwarajyanywe mu nkiko kubera uruhare rwabwo muri Jenoside.

Ati “U Bufaransa bukwiye kuba buri mu rukiko, buburanishwa aho kuba undi muntu uwo ari we wese mu Rwanda kandi aho kuba Abanyarwanda.”

CNLG yakiriye neza iki cyemezo

Umunyamabanga Nshingwabikorwa wa Komisiyo y’Igihugu yo kurwanya Jenoside, Dr. Jean Damascène Bizimana, yabwiye IGIHE ko ari icyemezo cyari gikwiye kuri iyi dosiye bitewe n’uko nta kindi kimenyetso u Bufaransa buteza kuzabona kirenze ibyagaragajwe n’Abacamanza n’impuguke zaje mu Rwanda mu 2010.

Ati “Ni icyemezo gikwiye kuri iyi dosiye. Inyigo yakozwe n’impuguke z’Abafaransa mu 2010, abacamanza bazanye impuguke berekana hashingiye ku bumenyi bwa tekiniki ko amasasu yarasiwe mu Kigo cya Gisirikare cya Kanombe.”

Ngo mu busanzwe, iyo igenzura ryerekanye aho amasasu yarasiwe, biba bikwiye kubazwa abari bashinzwe kuharinda aribo Ingabo za Habyarimana; gusa ngo ibyo ntibyakozwe.

Dr. Bizimana yakomeje avuga ko igihe kigeza kugira ngo iri perereza ribe rirangire burundu nyuma y’inshuro zitandukanye ryagiye rikorwa ariko rigasubukurwa.

Tariki ya 16 Nzeri 2010 ubwo Umucamanza Marc Trevedic yari mu Rwanda mu iperereza ku ihanurwa ry’indege ya Habyarimana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza