U Rwanda rurahakana ibyo rushinjwa na guverinoma ya Congo Kinshasa

Nyuma y’aho Umuryango uharanira uburenganzira bwa muntu usohorere raporo ishyira u Rwanda mu majwi ku kuba rufasha inyeshyamba za M23 zimaze iminsi zihanganye n’iza leta ya Congo Kinshasa, Leta y’iki gihugu kuri ubu yatangaje ko yemeranya n’ibikubiye muri iyi raporo, gusa Leta y’u Rwanda ku yindi nshuro yongeye guhakana ayo makuru.

Nk’uko tubikesha itangazo ryaturutse muri Minisiteri y’Ububanyi n’Amahanga y’u Rwanda, Minisitiri Louise Mushikiwabo yatangaje ko ibyo umuvugizi wa Leta ya Congo Kinshasa, Lambert Mende, ashinja u Rwanda bibabaje cyane.

Yagize ati : “Birababaje cyane kuba Congo Kinshasa yahisemo gushinja u Rwanda ibinyujije mu itangazamakuru mbere gato y’uko dushyira umukono kuri raporo y’igenzura ryakozwe ku bufatanye n’impande zombi, iyi ikaba yari ishinzwe kunononsora ibiregwa u Rwanda hatandukanywa ukuri n’ikinyoma.”

Muri iryo tangazo, Minisitiri Mushikiwabo yavuze ko ari ibyago ku baturage bo mu burasirazuba bwa Congo kuba guverinoma yahisemo ikinyoma cyambaye ubusa, ndetse ngo ni aba baturage bazagirwaho ingaruka no kuba hazamuka undi mwuka w’urwango."

Yagize ati : “Turabyumva neza ko leta ya Congo Kinshasa ikomeje guhura n’ibibazo bikomeye bituruka mu mpande nyinshi, ndetse kandi ko gukoresha u Rwanda nk’agakingirizo ari uburyo bwo gushaka kuyobya uburari no kwibagiza abantu ibiri kubera muri icyo gihugu.”

Ati : “Twarabivuze kenshi ko ntaruhare tubifitemo, kandi nta kimenyetso kigaragaza ibinyuranye n’ibyo. Kuba Congo Kinshasa yarananiwe gukemura ibibazo imazemo igihe kitari gito ifite bigiye kugira ingaruka ku bihugu bituranye nayo."

Twabibutsa ko mu ntangiriro z’icyumweru gishize aribwo ishyirwa ahagaragara rya raporo nshya ya Human Rights Watch ryatangajwe, iyi ikaba ikubiyemo ingingo zitandukanye zitunga agatoki Leta y’u Rwanda, uwo muryango wemeza ko yahaye ibikoresho ndetse n’abarwanyi inyeshyamba zihanganye na Leta ya Congo Kinshasa zo mu mutwe wiyise M23.

Mu itangazo ryashyizwe ahagaragara mu byumweru bibiri bishize, Leta y’u Rwanda yagize iti : “Ntitwivanga mu bibazo bya Congo Kinshasa by’imbere mu gihugu, yaba ibirebana na politiki cyangwa ibirebana n’igisirikare. Ibirego bivuga ibihabanye n’ibyo nta shingiro bifite.”

“Guverinoma y’u Rwanda yakomeje igira iti : “Ni nde wungukira muri uyu mutekano mucye ukomeje kuranga igice cy’uburasirazuba bwa Congo Kinshasa ? Si abaturarwanda, si abanyekongo. Abungukira muri izo mvururu ni inyeshyamba zo mu mutwe wa FDLR ziboneraho guteza umuteko mucye.

Human Rights Watch kandi nayo yashyizwe mu majwi na Leta y’u Rwanda ivuga ko mu gushyira ahagaragara ibi birego ahanini uyu muryango ngo uba ugamije kureba uko wakusanya amamiliyoni y’amadolari yifashishije “raporo za hato na hato zishingiye ku binyoma biba bitakorewe ubushakashatsi.”

Twabibutsa kandi ko mu gihe gishize nabwo Monusco yari yasohoye icyegeranyo gitunga agatoki u Rwanda mu buryo bumwe na Human Rights Watch, gusa Monusco nayo yagaragarijwe n’u Rwanda ko rusanga yarananiwe kuzuza inshingano zayo, ahubwo ko n’umutekano wakomeje kujya ubasha kuboneka mu burasirazuba bwa Congo Kinshasa wabaga waturutse ku bufatanye hagati ya Congo Kinshasa n’u Rwanda, ko yo (Monusco) nta ruhare na mba yabaga yabigizemo.