IGIHE.com > Amakuru > U Rwanda
Ubushinjacyaha bukuru bw’u Rwanda buranenga ICTR kugira abere Mugenzi na Mugiraneza

Ubushinjacyaha bukuru bw’u Rwanda buranenga ICTR kugira abere Mugenzi na Mugiraneza


Yanditswe kuya 5-02-2013 - Saa 18:59' na Faustin Nkurunziza

Umushinjacyaha Mukuru w’u Rwanda, Ngoga Martin, yanenze bikomeye icyemezo cy’Urukiko Mpuzamahanga Mpanabyaha rwashyiriweho u Rwanda (ICTR) kugira abere ku byaha bya jenoside yakorewe Abatutsi Mugenzi Justin na Mugiraneza Prosper bahoze ari abaminisitiri muri ‘Leta y’Abatabazi’.

Mu kiganiro yagiranye n’ibitangazamakuru binyuranye ku wa 5 Gashyantare, Ngoga yavuze ko abo bagabo kuba baragizwe abere na ICTR bitavuze ko bihanaguye ibyaha bakoreye mu Rwanda ati “ Ni ubuhe bushakashatsi bwakozwe kuri abo bantu bituma bagera aho bagirwa abere ?”

Ngoga avuga ko hari ibimenyetso bigaragaza ibyaha bakoze, birimo kuba baritabiriye inama yo ku wa 17 Mata 1994 yirukanye Perefe Jean Baptiste Habyarimana w’icyari Perefegitura ya Butare, akaza no kwicwa kuko atari ashyigikiye umugambi wabo wo kwica Abatutsi ; byongeye kandi ngo hari n’ibindi bimenyetso n’abatangabuhamya babashinja ibyaha bakoze.

Ngoga yavuze ko batishimiye ibyakozwe na ICTR, ati “ Uru rukiko tuzakomeza kubabwira ukuri kwacu nubwo banze kukumva, ndetse n’abandi bose batishimira ko abakoze jenoside bakidegebya mu bihugu byo hanze, bacirwa imanza.”

Umushinjacyaha Mukuru w’u Rwanda, Ngoga Martin

Ngoga avuga ko nk’u Rwanda rufite uburenganzira bwo kugaragaza ko rutishimiye icyemezo cya fashwe cyo kugira abere Mugiraneza na Mugenzi.

Ubushinjacyha bw’u Rwanda bwatangaje ko nubwo ntacyo babikoraho kuko byari mu bujurire, bizandikwa mu mateka, bikazasomwa no mu gihe kizaza ko ICTR yakijije urubanza nabi.

Ibi bibaye nyuma y’uko ICTR mu rugereko rw’ubujurire ku wa mbere tariki 4 Gashyantare 2013 rwagize abere Mugenzi Justin wari Minisitiri w’Ubucuruzi na Mugiraneza Prosper wari Minisitiri w’Imirimo ya Leta mu gihe cya Jenoside yakorewe Abatutsi muri 1994, ariko mu 2011 Urukiko rwa ICTR rwari rwabakatiye igifungo cy’imyaka 30 mu rugereko rw’ibanze.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO