IGIHE.com > Amakuru > U Rwanda
Uganda:Umunyarwanda Nsenga Juvenal yishwe n’umugore we

Uganda:Umunyarwanda Nsenga Juvenal yishwe n’umugore we


Yanditswe kuya 14-01-2013 - Saa 18:05' na Emmanuel Kanamugire

Urupfu rwa Nsenga Juvenal rwatunguye benshi mu Banyarwanda batuye muri Uganda, nyuma y’aho umugore we Uwera Jackie yararugizemo uruhare nk’uko byatangajwe n’ibitangazamakuru byo muri Uganda.

Chimpreports.com cyanditse ko Nsenga yari umuhungu wa Kananura Donnat, umucuruzi ukomeye muri Uganda akaba ari we watanze amakuru y’urupfu rw’umuhungu we ku wa gatandatu w’icyumweru gishize.

Uko byagenze

Kananura unayobora Abanyarwanda batuye muri Uganda avuga ko nyuma ya Noheli Uwera yirukanye abakozi bose amaze kurakaranya n’umugabo we. Avuga ko Nsenga yabajije umugore we uzakora imirimo yo mu rugo, amusubiza ko we ubwe azayikorera.

Ibihe bya nyuma bya Nsenga

Kananura avuga ko ku wa gatanu Uwera yahamagaye Nsenga akamusaba gutaha vuba na bwangu kuko hari ijambo ryihutirwa yari amufitiye atashakaga kumubwirira kuri telefoni.

Atanga ubuhamya bw’uko byagenze, Kananura yagize ati “Hari nka saa moya z’umugoroba ubwo umuhungu wanjye yageraga mu rugo, arebye mu nzu hose ntiyashobora kubona umugore we kuko atari ahari. Byatumye amuhamagara kuri telefoni amubaza aho yagiye. Uwera yagarutse mu rugo ahagana saa tatu za nijoro, ageze mu marembo asanga umuzamu ntahari, akanda inzogera nyuma ahamagara umugabo we ngo amukingurire. Nsenga yabanje gufungura urugi rw’ibumoso, aza gupfukama ngo afungure urw’iburyo.Ubwo yapfukamaga ngo afungure Uwera yaramugonze amuvunagura imbavu, aramukurura amwinjiza mu gipangu bari batuyemo.”

Muri uwo mwanya Uwera yahise amupfuka inguma yari afite amujyana ku bitaro bya Paragon biri hafi y’aho bari batuye, akaba ari na ho yaguye nyuma y’amasaha atandatu.

Kubabarira no kwibagirwa

Kananura ngo yasabye abo mu muryango we kubabarira Uwera kugira ngo abashe kurera abana babiri umuhungu n’umukobwa yari amaze kubyarana na Nsenga.

Nyuma Kananura yaje gusaba Polisi ya Uganda guhagarika iperereza ku rupfu rwa Nsenga, avuga ko yamaze kumubabarira abikuye ku mutima.

Polisi yatangaje ko igomba gukomeza iperereza hagamijwe kumenya niba uru rupfu rwarakomotse ku mpanuka cyangwa ari icyaha cyateguwe.

Nsenga yari umucuruzi w’umukire mu Mujyi wa Kampala. Kananura yabwiye abari baje kunamira umuhungu we ko Uwera yemeye uruhare rwe mu rupfu rw’umuhungu we Nsenga. Azashyingurwa mu Karere ka Kanungu ku ya 15 Mutarama 2013.

Amafoto yo kunamira Nsenga

Photo/Chimpreports

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO