IGIHE.com > Amakuru > U Rwanda
Umukobwa w’imyaka 18 yafashwe ku ngufu na musaza we

Umukobwa w’imyaka 18 yafashwe ku ngufu na musaza we


Yanditswe kuya 23-05-2012 - Saa 11:02' na Dushimiyimana Olivier na Olivier MUHIRWA

Ku mugoroba wo ku Cyumweru tariki ya 20 Gicurasi 2012, mu Karere ka Ngororero mu Burengerazuba rw’u Rwanda, nibwo mu masaha ya saa kumi n’ebyiri n’igice z’umugoroba umugabo w’imyaka 28 y’amavuko yafashe kungufu mushiki we w’imyaka 18 y’amavuko.

Uyu mwana w’umukobwa wafashwe twirinze gutangaza amazina ye, yiga mu mwaka wa kane mu mashuri yisumbuye

Kuri uyu wa Kabiri mu saa tanu, nibwo umunyamakuru wa IGIHE ukorera mu Ngororero yamenye iyi nkuru maze yihutira kuvugana n’uwahohotewe.

Uyu wahohotewe yemeye kuvugana n’umunyamakuru maze amutangariza ibyamubayeho muri aya magambo :

Yagize ati: "Ubwo nari mvuye ku ishuri nje mu gahushya ko kwivuza, nageze mu rugo nuko ahagana mu ma saa kumi n’ebyiri nibwo naherekeje mugenzi wanjye wari wansuye (ntiyashatse kumuvuga mu izina) maze igihe tukigenda twumva abantu badutera amabuye ariko ntitwababona, maze uwo mugenzi wanjye nibwo yansabaga ko yamperekeza ngasubira mu rugo, kuko yakekaga ko ashobora kuba ari umuntu ushaka kungirira nabi."

Uyu mukobwa ndetse na mugenzi we bahise bagenda, amugejeje mu rugo aramusezera nawe arataha. Ariko ngo muri ako kanya musaza wa wamukobwa yahise ahamagara uwo mugenzi we, amubaza uwo ariwe ndetse n’icyamugenzaga ariko undi we amwima amatwi aritahira.

Muri uko gusigarana na mushiki w’uyu mugabo (Twanze kumutangaza amazina ye ku mpamvu z’umutekano z’uwahohotewe), ngo yasigaye amutuka, ariko hagari aho ngo ahamagara n’umugore we amusaba ko yacana itara ariko umugore we amubwira ko nta kibiriti yari afite, amusaba kujya kumugurira icyindi kibiriti.

Ubwo nibwo uwo musore yasabye mushiki we ko yamuherekeza, undi abanza kumwangira ngo kuko yumvaga ananiwe kandi bwari gucya asubira ku ishuri. Musaza we ariko we ntiyabyumvise, kuko yakomeje kumuhata kandi amukanga, undi ngo kubera ko atuwe amutinya yemera kumuherekeza, ariko nta kindi yigeze atekereza kuko yari musaza we yumva nta kibi yamukorera.

Uyu mukobwa yagize ati : "Ubwo nibwo twagendaga tuganira bisanzwe nk’abavandimwe maze tugeze ahantu hahinze kawa, nta rugo na rumwe ruri hafi yaho, nibwo yambwiraga ngo si nshaka ko hagira undi uzaha utarampa! Numva nguye mu kantu ndamubaza nti : "Uvuze ngo iki ?". Ati :"Ndavuze ngo si nshaka ko ugira undi uzaha utarampa kandi ngirira vuba ntuntinze cyangwa nkwice".

Uyu mukobwa n’agahinda kenshi n’ikiniga yakomeje agira ati : "Nibwo nabonaga atangiye guhinduka aza ansatira aba aramfashe ankubita hasi atangira gukora ibyo yashakaga, bitewe n’ukuntu afite ingufu nta kindi nabonye nakora kuko no kwinyagambura ntabibashaga, ubwo nararetse akora ibyo akora nanga ko wenda yavaho akanansinda aho nuko arangije numva arambwiye ngo haguruka uve aha, kandi nugira uwo ubwira umenye ko ubuzima bwawe burangiye, habe na Mama ninumva ko yabimenye umenye ko ubwo ibyawe birangiye."

Uyu mwana w’umukobwa nta kindi yongeye gutangariza umunyamakuru, kuko ikiniga n’agahinda byamubujije kuvuga ahubwo ararira.

Umubyeyi we se abivuga ho iki?

Ubwo umubyeyi w’uyu mwana w’umukobwa akaba na nyina w’uyu wakoze ibara tutashatse gutangaza amazina ye muri iyi nkuru, yaganiraga na IGIHE, yavuze ko yabimenye aho umukazana we (Umugore w’uyu mugabo wafashe mushikiwe ku ngufu), yamubazaga impamvu arimo kumva intonganya hagati y’umugabo we na mushiki we . Uyu mubyeyi we ariko nta kindi yaketse kuko yasubije umukazana ko ahari wenda amuziza ko arimo kugenda nijoro.

Uyu mukecuru ngo akimara kumubwira ibi ariko yahise abona umugabo we amugezeho yahinduye isura. Uyu mukecuru agira ati: "Tukimara kuvugana nibwo nagiye kubona mbona uwo musaza we arinjiye ansaba ibiryo, mubaza niba umugore we atatetse ariko ntiyagira icyo ansubiza ahubwo ansaba kugira vuba nkamuha ibiryo".

Uyu mukecuru akomeza agira ati:” Ubwo yahise ambwira ngo gira vuba nirire yewe ibyo umbwira ntabyo nkeneye kumva.”

Ngo kubera ko n’ubundi bari basanzwe bamutinya ndetse ngo n’Ubuyobozi bukaba butamuvugaho, ngo Nyina yahise yiruka ajya kumuzanira ibiryo. Uyu mukecuru agira ati:” Akimara kurya ubwo yahise yinanurira mu muryango avuga ngo:”Sawa mukecu unyiciye isari”.

Muri ako kanya ariko nibwo mushiki we yahise yinjira, ariko musaza we amusaba kutamena ibanga, amusaba gukomera ku isezerano ryo kutamena ibanga, ndetse ubwo ahita ajya kuryama ariko arira ari naho nyina yaje kumusanga, amubaza ibyamubayeho abanza kwanga kubimubwira, ariko nyuma amutekerereza ibyamubayeho byose.

Uyu mukecuru agira ati:”Akimara kubimbwira numvise ko tugushije ishyano n’umva umusatsi umvuyeho, mpita musaba ko twajyana kubibwira mukuru we, njye nkajya kwiyahura kuko nabonaga bindenze ntashaka kuzongera kurebana mu maso na musaza we.”

Nk’uko bakomeje babibarira umunyamakuru wa IGIHE, ngo bageze kwa mukuru we nibwo yabihanganishije ndetse asaba nyina kutiyahura, ahubwo abasaba kwiyambaza ubuyobozi.

Gusa ngo ubwo yasabwaga kwitabaza ubuyobozi, uyu mukecuru yavuzeko ntacyo babamarira ngo kuko n’ubundi ubuyobozi ntacyo bwari butuwe bumufasha ku birrebana n’uyu mugabo we.Abaturanyi ariko bakomeje kumuhata bahamagara Polisi nayo isaba aba Local Defense guta uwo mugabo muri yombi ari nako byaje kugenda maze uyu mugabo arafatwa aho ari mu maboko ya Police akaba yerekejwe aho bita i Nyagisagara, maze bategeka ko uwo mugabo aba afunzwe maze abandi nabo bakerekeza kwa muganga.

Uyu muryango we wifuza iki ?

Ubwo umunyamaku yababazaga icyo bifuza, uyu mukobwa yagize ati: "Icyo nifuza nuko bamufunga agahanwa n’amategeko kuko n’ubundi nibamurekura byanga bikunze twese azatwica, kuko niryo sezerano yaduhaye." Ibi abihuriraho bose nk’umuryango kuko ngo n’ubusanzwe yabazengereje ataretse n’abaturanyi n’ubwo ubuyobozi bwabyirengagizaga.

Uwahohotewe we kwa muganga bamuhaye imiti yo kunywa kugira ngo imurinde kwandurwa indwara uwamufashe afite, ariko akaba agomba gusubira ku ishuri gukomeza amasomo ye nk’uko bisanzwe, akaba azasubira kwa muganga ku itariki ya 06 Kamena 2012.

Tuganira n’umuvugizi wa Polisi y’u Rwanda, Supt. Theos Badege, yadutangarije ko ibi byerekana ko hakiri ihohoterwa rishingiye ku gitsina, ariko kandi akaba asaba abatu kugira ubumuntu ndetse bakirinda amahano nk’aya, ababyeyi baganiriza abana babo kandi n’abantu bakabiganiraho, maze ibi bikaba byakumirwa mbere y’uko bikorwa.

Ikindi ni uko uyu wakoze ibi, agiye gukurikirwanwa nk’uko amategeko abiteganya.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO