IGIHE.com > Amakuru > U Rwanda
Umunsi nyafurika w’Ibarurishamibare wizihirijwe mu Rwanda

Umunsi nyafurika w’Ibarurishamibare wizihirijwe mu Rwanda


Yanditswe kuya 18-11-2012 - Saa 16:23' na Emmanuel Kwizera

Umunsi Nyafurika wo guteza imbere Ibarurishamibare wizihirijwe mu Rwanda aho harebewe hamwe ku mibereho y’abagore n’abagabo kugira ngo hafatwe ingamba zo gukora politiki ibageza ku mibereho myiza, hanahembwa abanyeshuri bo muri za Kaminuza bitabiriye amarushanwa ku ibarurishamibare.

Uyu munsi wemejwe mu 1990 n’Umuryango w’Abibumbye ufatanije n’abaminisitiri bose bo muri Afurika bashinzwe iterambere. Uyu mwaka wahawe insanganyamatsiko ijyanye no gukora Ibarurishamibare rigaragaza neza uruhare rw’abagore n’urw’abagabo.

Mu gihe kingana n’icyumweru bizihiriza mu Rwanda intera ibarurishamibare ryagezeho, ngo mu myaka ishize nta mibare myinshi u Rwanda rwari rufite dore ko ngo iyi yari imbogamizi kuri byinshi ariko kuri ubu ngo imibare myinshi ibafasha mu igenamigambi ritandukanye yashyizwe ahagaragara.

Bafatanije na Kaminuza zo mu Rwanda bateguye amarushanwa ku ibarurishamibare mu banyeshuri ba za kaminuza bari biremyemo amatsinda asaga 56 yari yariyandikishije, ngo muri yo agera kuri 15 ni yo yakoze neza kurusha andi, hahembwamo 3 ya mbere.

Umuyobozi w’Ikigo cy’Igihugu cy’Ibarurishamibare mu Rwanda, Youssuf Murangwa yagize ati “Abagore hari hamwe na hamwe bagenda badindira, rero ibarurishamibare rigamije kuzunganira gahunda zo kubateza imbere kugira ngo bose hamwe bazafatanye n’abandi kwiteza imbere mu buyobozi, mu burezi, n’ahandi ikibazo cy’ubusumbane kirimo kugenda gikemuka by’umwihariko mu Rwanda”.

Yakomeje ati : “Itangiriro ry’ibarurishamibare ni amashuri niyo mpamvu twiyemeje gukorana n’amashuri makuru arimo INES Ruhengeri, Kaminuza Nkuru y’u Rwanda (NUR), KIST n’izindi. Turakangurira abanyeshuri kwitabira ibarurishamibare”.

U Rwanda nka kimwe mu bihugu bya mbere muri Afurika bikoresha ibarurishamibare, ngo rugiye no gukora EDPRS II rushingiye ku ibarurishamibare.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO