IGIHE.com > Amakuru > U Rwanda
Umushinga mpuzabahanzi « Abantu bahagaze bemye » ahibukirwa Jenoside yakorewe Abatutsi

Umushinga mpuzabahanzi « Abantu bahagaze bemye » ahibukirwa Jenoside yakorewe Abatutsi


Yanditswe kuya 9-02-2013 - Saa 08:24' na Karirima A. Ngarambe

Mu Rwanda hagiye gutangizwa umushinga mpuzabahanzi w’amashusho ku nkuta z’ahibukirwa Jenoside yakorewe Abatutsi muri Mata 1994. Uwo mushinga wiswe « Abantu bahagaze bemye » watekerejwe mu rwego rwo kugira ngo haboneke ibihangano bijyanye n’igihe cyo kwibuka Jenoside yakorewe Abatutsi, kandi biha agaciro n’icyubahiro abazize uko bavutse.

Kugira ngo dushobore kumenya byinshi kuri uwo mushinga IGIHE twaganiriye na Rwayitare Providence, Umufatanyabikorwa w’umuhanzi Bruce Clarke, wageze mu Rwanda ku wa 8 Gashyantre 2013 mu rwego rwo gutangiza gahunda yise « Abantu bahagaze bemye ».

Rwayitare Providence agira ati “Abantu bahagaze bemye » ni umushinga w’ubuhanzi bugamije kwibuka. Watekerejwe n’umunyabugeni Bruce Clarke bivuye ku cyifuzo cy’uko haboneka ibihangano bijyanye n’umurimo wo kwibuka, byo kwerekana mu gihe cyo kwibuka Jenoside yakorewe Abatutsi mu 1994. »

Rwayitare akomeza atangaza ko uwo mushinga ugamije guhanga amashusho yimbitse, agaragaza ahantu hiciwe abantu n’ahubatse inzibutso za Jenoside mu Rwanda. Ati « Hazashushanywa abagabo, abagore n’abana mu buryo bw’ubugeni hanze y’inzibutso za Jenoside ahabonwa na bose. Ibyo bishushanyo by’ibihangange, bigera kuri metero 5 z’uburebure, bizagaragarira ababireba nk’imibyimba y’abantu itaziguye ariko ihamye, ishushanya icyubahiro cy’abambuwe ubumuntu muri Jenoside, baba abishwe cyangwa abarokotse. Abo Bantu bahagaze bemye, bahagaze nk’abahamya b’amateka y’umubabaro. Ikigamijwe ni Urwibutso rw’abishwe no gusubiza agaciro buri muntu mu bo Jenoside yari igamije gutsemba, kubasubiza icyubahiro bambuwe. »

Akomeza avuga ko ahantu hagiye harimburirwa abantu hazaba hatuwe n’ibyo bimenyetso kugira ngo hatagira ubibagirwa. Ko kandi ibyo bimenyetso bishobora gushushanywa ku nzibutso zitandukanye no gushyirwa hirya no hino ku Isi yose mu itumba ry’umwaka wa 2014 mu gihe cyo kwibuka Jenoside ku nshuro ya 20.

Ikindi Rwayitare agaragaza ni uko ayo mashusho azaba ashimangira ko Abanyarwanda bahagaze bemye, bafite ishema n’ubwo banyuze mu bikomeye.

Agira ati « Umuryango mpuzamahanga, ibihugu by’ibihangange na LONI bakwiye kwibuka abishwe, gukomeza abarokotse no kwibuka uruhare rwabo mu bikorwa bitandukanye byatugejeje kuri jenoside mu Rwanda. Ikigamijwe aha, ni ukumenyesha amateka ya Jenoside umuryango mpuzamahanga, gukangurira inyokomuntu yose ibyabaye mu 1994 no kurema urutindo ruhuza abanyarwanda n’abandi baturage b’Isi. »

Umushinga w’ubuhanzi bushushanya ku nkuta bugenewe abantu bose, uzayoborwa n’umunyabugeni Bruce Clarke uzakorana n’abayobozi b’u Rwanda mu nzego zitandukanye n’amashyirahamwe y’abarokotse Jenoside, ukazakorerwa ku nzibutso n’ahandi hantu hafitanye isano na Jenoside, hashyirwa ibishushanyo ku nkuta hakoreshejwe amarangi. Hazacapwa kandi ibishushanyo cyangwa bishushanywe ku mizingo minini, byatuma byoroha kubyimurira ahandi nko cyicaro cy’Umuryango w’Abibumbye i New York cyangwa ku mbuga yitiriwe uburenganzira bwa Muntu i Paris.

Mu majoro yo kwibuka hazakoreshwa amatara ashushanya « Abantu bahagaze bemye ».

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO