IGIHE.com > Amakuru > U Rwanda
Urwego rw’Umuvunyi mu kwakira ibibazo by’abaturage hifashishijwe ikoranabuhanga

Urwego rw’Umuvunyi mu kwakira ibibazo by’abaturage hifashishijwe ikoranabuhanga


Yanditswe kuya 16-01-2013 - Saa 07:33' na Faustin Nkurunziza

Urwego rw’Umuvunyi rwashyiriyeho abaturage bo mu Karere ka Ngoma uburyo bw’ikoranabuhanga hifashishijwe ‘Internet’ mu kubagezaho ibibazo byabo bikabasha kubonerwa ibisubizo.

Biciye mu rwego rw’amadini n’ ibigo bya Kaminuza, Urwego rw’umuvunyi rwarabifashishije kuko bahura n’abantu benshi kugira ngo bajye bafasha abaturage kugeza ibibazo byabo ku rwego rw’Umuvunyi hifashishijwe ‘Internet’ kandi bakabikorerwa kubuntu.

Hafunguwe ahantu hakoreswa 'internet' mu kwakira ibibazo bikagezwa ku Muvunyi

Habakurama Peter, akorera muri ‘Cyber café’ y’Urwego rw’Umuvunyi mu karere ka Ngoma ku bufatanye na Anglican Church diyoseze ya Kibungo. Avuga ko iyi ‘Cyber’ yaje mu rwego rwo kwegera abaturage bafite ibibazo byananiranye ku murenge no ku karere.

Avuga ko iyi gahunda kuva yatangira amaze kwakira ibibazo birenze 15, ibyinshi ngo ukaba usanga ari ibijyanye no kuburana amasambu n’indi mitungo. Ikindi ni uko ibibazo abaturage babagezaho ngo biba bivuye mu mirenge igize akarere.

Ibyo bibazo akenshi ngo abaturage babizana byaratinze gukemurwa n’abayobozi, bigatuma bayoboka Urwego rw’Umuvunyi.

Habakurama avuga ko mu bibazo babashije gukemurira abaturage harimo nk’ibyo mu mirenge ya Rukira na Rurenge mu kagali ka Rujambarara, aho bakemuye ikibazo cy’amasambu yaburanwaga.

Akomeza avuga ko ibi bibazo bikemurwa bibanza guca mu nzego zo ku murenge n’akarere biteyeho umukono, hanyuma umuturage akabona kubizana ku mukozi w’Urwego rw’Umuvunyi byanditse ku mpapuro na we akabisikana [scan] hanyuma bakabyohereza hifashishijwe ’Internet’.

Izi mashini zifasha impapuro abaturage bazanye kugera ku Rwego rw'Umuvunyi nyuma yo kuzisikana (Scan)

Avuga kandi ko ibi biri mu rwego rwo korohereza abaturage guhora basiragira i Kigali bajyana ibibazo byabo ku rwego rw’Umuvunyi, kuko ngo wasangaga akenshi umuturage wajyanaga ikibazo cye i Kigali yarabaga adafite aho arara yemwe ngo nta n’abavandimwe be ahagira.

Aha hantu hafasha abaturage kugeza ibibazo byabo ku rwego rw’Umuvunyi zikorera mu turere dutandatu ari two Rusizi, Rubavu kuri ULK, Huye, Gicumbi, Ngoma na Nyagatare.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO