Abaherwe ku isi badakozwa ibyo gushyira abagore mu buyobozi bukuru bw’ibigo byabo

Yanditswe na Zigiranyirazo Bajecteur
Kuya 27 Nzeri 2017 saa 09:13
Yasuwe :
4 0

Abaherwe benshi bo mu bihugu byo mu Burasirazuba bw’isi ntibakozwa ibyo gushyira abagore mu buyobozi bukuru bw’ibigo byabo. Uretse kuba banaterwa ingabo mu bitugu n’imwe mu myemerere y’amadini, abagabo b’abaherwe bo mu bihugu nk’u Bushinwa, u Buyapani na Koreya y’Epfo usanga mu buyobozi bw’ibigo byabo abagore ari mbarwa.

Iki kintu cyo kutagira abagore mu buyobozi by’umwihariko kigaragara mu bigo by’ikoranabuhanga bikomeye muri Aziya nka SoftBank Group Corp iyobowe na Masayoshi Son; Keyenke Corp yashinzwe na Takemitsu Takizaki, Tencent Holdings Ltd ya Ma Huateng uzwi ku kabyiniro ka Ponny Ma, Baidu Inc ya Robin Li, Samsung Electronics Co ihagarariwe na Lee Kun-hee ndetse na SK Hynix Inc ya Chey Tae-won. Aha hose nta mugore wabona mu buyobozi bukuru.

Umuherwe wo mu gihugu cy’u Bushinwa, Ma Yun uzwi ku izina rya Jack Ma akaba n’umuyobozi w’ikirenga wa Alibaba Group afite umugore umwe rukumbi mu buyobozi bw’iki kigo.

Mu gihe mu bindi bihugu ku isi usanga hari abashyiraho politiki zigaragaza akamaro k’abagore mu iterambere, abaherwe benshi bo muri Aziya ntibabikozwa.

Umugabane wa Aziya uza ku inyuma ya Amerika y’Epfo mu kutumva icyo guha abagore inshingano runaka mu bigo bikomeye bivuze. Muri ibyo bihugu abagore bayobora ibigo bangana na 7.6 % mu gihe ku mugabane w’u Burayi ari 22.6 % nkuko byagaragajwen’ubushakashatsi bwakozwe n’ikigo Deloitte LLP.

Umuyobozi w’ikigo Women Corporate Directors Foundation, Susan Stautberg yavuze ko abagabo b’abakire bifuza kugira inshuti zikomeye aho kugira abagore bakomeye mu buyobozi bw’ibigo byabo.

Mu baherwe batanu baza ku isonga mu gihugu cy’u Bushinwa, Hui Ka Yan, umuyobozi wa Evergrande Group ni we waciye agahigo, agira abagore babiri mu buyobozi .

Nubwo bitoroshye kuba umuntu yahamya ko kutagaragara kw’abagore mu bigo bikomeye muri Aziya bisubiza inyuma imikorere myiza; inyigo nyinshi zagiye zigaragaza ko abagore ari inkingi ya mwamba mu kwesa imihigo mu bijyanye n’imikorere myiza nkuko Bloomberg dukesha iyi nkuru ibitangaza.

Kutagaragara kw’abagore mu buyobozi bukuru bw’ibigo bikomeye bibangamiye cyane abaharanira uburenganzira bwa muntu, cyane cyane iyo babona ibindi bigo bikomeye byo muri Leta Zunze Ubumwe za Amerika abagore mu buyobozi biyongera.

Igihugu cya Koreya y’Epfo kiza ku isonga mu kutagira abagore b’abayobozi mu bigo bihakorera aho bari ku rugero rwa 2 % kigakurikirwa n’u Buyapani bufite 4 % na ho u Bushinwa bukagira 9 %.

Nko mu gihugu cy’u Buhinde ho uretse umuherwe uza ku mwanya wa gatanu, Shiv Nadar, uyobora HCL Technologies Ltd ufite abayobozi b’igitsina gore batatu mu buyobozi bwe ubariyemo n’umukobwa we, abandi baherwe bane ba mbere muri icyo gihugu bafitemo ntibarenza umugore umwe mu buyobozi kandi nabwo ni ukubera itegeko ryashyizweho ko nibura mu buyobozi bukuru hakwiye kubonekamo umugore umwe.

Umuherwe wo mu gihugu cy’u Bushinwa, Ma Yun uzwi ku izina rya Jack Ma akaba n’umuyobozi w’ikirenga wa Alibaba Group afite umugore umwe rukumbi mu buyobozi bw’iki kigo

bajecteur@igihe.rw


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza