Abarenga miliyari bashobora kwibasirwa n’imitingito ikomeye mu 2018

Yanditswe na Habimana Jean Baptiste
Kuya 28 Ugushyingo 2017 saa 10:24
Yasuwe :
0 0

Abashakashatsi baherutse kugaragaza ko abaturage babarirwa muri miliyari bashobora kwibasirwa n’imitingito ikaze umwaka utaha, biturutse ku muvuduko muke isi iri kugenderaho muri ino myaka, mu gihe yizengurukaho.

Imitingito igera kuri 20 kandi ifite ubukana, ishobora kuzibasira isi mu mezi 12 ari imbere ugereranije n’iyabayeho mu mezi atandatu ashize.

Impuguke mu bya Siyansi zo muri Kaminuza za Colorado na Montana muri Leta Zunze Ubumwe za Amerika, zihamya ko urugendo isi ikora yizenguruka n’umuvuduko ikoresha, bishobora kuzateza ingorane zitunguranye ziganjemo imitingito, izibasira ibice by’isi byegereye ingere mberabyombi (tropiques).

Uku kwizenguruka buhoro ku isi byaturutse ku ihindagurika ry’intera iri hagati y’izuba n’ukwezi. Umuhanga mu bijyanye n’ubumenyi bw’isanzure, David A. Salstein, yagaragaje ko impinduka zibaho zishingiye ku mpamvu nyinshi zirimo n’uruhurirane rw’imiyaga ivanze n’imvura izwi nka El Niño.

Aganira na Observer, Dr Roger Bilham wo muri Kaminuza ya Colorado yagize ati “Isano iri hagati y’imiterere y’isi mu buryo ikora urugendo yizengurukaho ndetse n’iyo mu nda y’isi ari naho imitingito ituruka, bishobora kuzarushaho guhinduka, ku buryo byazateza imitingito ikomeye umwaka utaha.”

Impuguke Bilham afatanije na Rebecca Bendick wo muri Kaminuza ya Montana, bakoze inyigo ku mutingito wabaye mu 1900, ukaba wari ufite igipimo cya 7. Basanze mu gihe cy’imyaka itanu yakurikiyeho, harabaye imitingito ikaze ugereranije na mbere, biturutse ku kuba umuvuduko isi yakoreshaga izenguruka waragabanutse.

Izi mpinduka mu by’ukuri ziba ari nto cyane, ku buryo zidashobora no kuba mu gihe kingana n’igice cy’isegonda. Nyamara ariko nk’uko abashakashatsi babigaragaje ngo zishobora guteza ingaruka. Ubu bushakashatsi bigaragara ko buziye igihe, kuko isi iri mu bihe byayo byo kugenda buhoro mu gihe yizenguruka, ikaba impamvu y’ibanze abantu bakeka ko umwaka utaha yazahura n’imitingito ikomeye.

Bilham yagize ati “Umwaka utaha dushobora kuzagwirwa n’imitingito myinshi. Hashize igihe kinini twibasiwe n’imitingito igera kuri itandatu, ariko umwaka utaha wa 2018, dushobora kuzawutangira twumva imitingito ikaze izaba ibarirwa muri 20.”

Kugeza ubu, uduce tuzibasirwa n’iyi mitingito nta wudukeka, ariko ubushakashatsi bwerekanye ko ishobora kuzibasira cyane ibice byegereye kuri ’tropiques’. Nubwo bimeze bityo, bamwe mu mpuguke mu by’ubumenyi bw’isi, ntibemeranya n’ibyavuye muri ubu bushakashatsi.

John Callan, ushinzwe itangazamakuru muri GNS Science, Ikigo cyo muri Nouvelle Zélande, kizobereye mu gukora ubushakashatsi mu bumenyi bw’isi n’imiterere y’ubutaka, yavuze ko bizasaba kubisobanura mu buryo bwimbitse kugira ngo abantu babyumve, aho kubirekera aho nk’ubushakashatsi.

Kugeza ubu ukuri guhari ni uko mu myaka 100 ishize humvikanye imitingito myinshi. Gusa, abantu nibareba neza isano iri hagati y’ibintu bigenda biba ku isi, bazasanga bifite aho bihuriye.

Isi ishobora kwibasirwa n'imitingito myinshi mu mwaka utaha
Umutingito wibasiye agace ka Pedernales mu Ntara ya Manabi muri Equateur mu 2016

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza