Amashyamba ashobora kugira uruhare mu kurwanya indwara z’impiswi

Yanditswe na Tombola Felicie
Kuya 11 Ukwakira 2017 saa 12:50
Yasuwe :
0 0

Ubushakashatsi bw’Abanyamerika bwagaragaje ko kugira ibiti byinshi, cyane mu bihugu bikiri mu nzira y’amajyambere aho kubona amazi meza ari ikibazo, bifasha kugabanya indwara z’impiswi n’izindi ziterwa n’amazi adasukuye.

Impiswi ni indwara iterwa no kurya ibyanduye cyangwa gukoresha no kunywa amazi mabi.

Ishami ry’Umuryango w’Abibumbye ryita ku buzima(OMS), rigaragaza ko buri mwaka abana 361000 bicwa n’impiswi kubera kubura amazi meza no kutagerwaho n’ibikorwa by’isuku n’isukura.

Kuba impiswi ari indwara ya kabiri mu zihitana abana bari munsi y’imyaka itanu nyuma ya malaria ni ikibazo gihangayikishije.

Nk’uko inkuru ya topsante ibivuga, ubushakashatsi bwakozwe na Kaminuza ya Vermont muri Leta Zunze Ubumwe za Amerika bugaragaza aho ibiti bihuriye n’ubuzima bwiza cyane cyane ku bana.

Ni ubushakashatsi bwakorewe ku bana 300,000 bo mu bihugu 35 hirya no hino ku isi, harimo nka Bangladesh, Philippine, Nigeria, Repubulika Iharanira Demokarasi ya Congo, Colombia n’ibindi.

Nyuma yo gusuzuma imibare yo mu myaka itandukanye, basanze muduce turimo ibiti byinshi ariho haboneka imibare mike y’abana barwaye impiswi.

Imizi y’ibiti yabigizemo uruhare binyuze mu kuyungurura amazi y’amasoko abaturage bavomaho maze akabageraho yacayutse.

Aba bashakashatsi basanze kongera ibiti nibura ku kigero cya 30% byagira ingaruka nziza mu guhashya impiswi.

Mu itangazo yashyize ahagaragara, Diego Herrera wari ukuriye iryo tsinda yagize ati « Ntabwo tuvuga ko ibiti aribyo birusha agaciro imisarane cyangwa imiyoboro y’amazi, ariko ibigaragazwa n’inyigo yacu ni uko amashyamba afite uruhare rukomeye mu gusukura amazi mu buryo buri kamere kandi agafasha abaturage b’aho ibikorwaremezo bitaragera.”

Kurwanya impiswi n’izindi ndwara zikomoka ku mazi yanduye byiyongera ku kandi kamaro k’amashyamba ku buzima bwa muntu karimo gutanga umwuka mwiza, kurwanya isuri n’ibindi.

[email protected]


Niba ushaka kuduha inkuru waduhamagara kuri 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza