Amerika: Inyuguti z’ikirango cya Hollywood zahinduwe zihabwa inyito isingiza urumogi

Yanditswe na Dusabimana Aimable
Kuya 2 Mutarama 2017 saa 06:58
Yasuwe :
0 0

Mu ijoro ry’ubunani umuntu utaramenyekana yuriye umusozi uriho ikirango kizwi cyane cya Hollywood ahindura inyuguti zacyo agiha ishusho y’amagambo agizwe n’imvugo isingiza urumogi.

Ibi bikozwe nyuma y’aho leta ya California itoye itegeko ryemerera abaturage guhinga urumogi.

Daily Mail yatangaje ko uwahinduye amagambo y’ikirango cya Hollywood yabikoze mu ijoro ryo ku wa Gatandatu yifashishije ibitambaro biriho ibimenyetso by’urukundo n’amahoro byakoreshejwe cyane n’abashyigikiye ko urumogi rwemerwa mu matora ya Kamarampaka yabaye muri Leta ya California mu Ugushyingo 2016.

Umuyobozi wa Polisi, Ishami rishinzwe umutekano w’inyubako rusange mu Mujyi wa Los Angeles, Sgt. Guy Juneau, yabwiye CBS ko polisi iri gukora iperereza ngo hamenyekane uyu muntu witwikiriye ijoro agahindura amagambo agize ikirango cya Hollwood akayaha inyito ya "Hollyweed".

Nyuma y’aho amafoto agaragaza ikirango cyahinduwe asakajwe n’abantu benshi ku mbuga nkoranyambaga ku isaha ya yine na mirongo ine n’itanu cyongeye guhabwa ishusho gisanganywe [Hollywood].

Si ubwa mbere ikirango cya Hollywood gihabwa ishusho y’amagambo asingiza urumogi mu mpera z’umwaka kuko no mu 1923 cyarahinduwe gihabwa inyuguti za "Hollywoodland" naho mu 1976 byakozwe n’abanyeshuri bo muri Kaminuza ya Northridge, mu 1983 nabwo iki kirango cyarahinduwe uwabikoze ntiyafatwa.

California iherereyemo imisozi ya Santa Monica irimo n’uwubatsweho ikirango cya Hollywood, ni imwe muri leta eshanu zemera ihingwa ry’urumogi muri Leta Zunze Ubumwe za Amerika.

Ubusanzwe iki kiyobyabwenge cyemewe muri leta zirimo Alaska, Colorado, Oregon na Washington, aha rukaba rwemewe guhingwa no gukoreswa ku mpamvu z’umuntu ku giti cye ariko rukaba rutagurishwa.

Ikirango cya Hollywood cyahawe imvugo isingiza urumogi n'umuntu utaramenyekana
Si ubwa mbere ikirango cya Hollywood gihindurwa
Umusozi uriho ikirango cya Hollywood unubatseho iminara ikoreshwa n'inzego za Polisi mu Mujyi wa Los Angeles

Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza