Amerika:Yavumbuye ko yarongoye umwuzukuru we nyuma y’amezi atatu babana

Yanditswe na Kanamugire Emmanuel
Kuya 8 Ukwakira 2016 saa 07:23
25 24

Umugabo w’imyaka 68 wo mu mujyi wa Miami muri Leta Zunze Ubumwe za Amerika yasanze yararongoye umwuzukuru we w’imyaka 24 nyuma y’amezi atatu bashakanye.

Aba bakunzi bamenye ko bafitanye isano ubwo barimo bareba amafoto y’umuryango muri album. Umugore ngo yitegereje amafoto asanga se umubyara ni umuhungu w’umugabo we.

Urubuga 7 sur 7 rutangaza ko uwo mugabo umwana w’umuhungu yabyaye bwa mbere atamureze, nyuma yo gutandukana na nyina akamujyana, ari na we waje kwibaruka umugore we w’ubu.

Nyuma yaho ngo uwo mugabo yashatse undi mugore ariko na we batandukana mu 2009.

Muri 2015, uyu mugabo w’imyaka 68 yiyandikishije mu kigo gihuza abantu bakeneye inshuti akaba ari na ho yaje kumenyanira n’uyu mwuzukuru we.

Umugore na we ngo yari yaratwaye inda bituma ku ishuri bamwirukana, n’umuryango we uramwanga.Nyuma yo kubyara umwana akamurera mu buryo bugoranye yaje kwiyandikisha mu kigo gihuza abashaka gukundana ari na ho yahuriye na sekuru amugira umugore.

Uyu mugore ngo ubwo yarebaga amafoto akabonamo ifoto ya se yatakaje ubwenge.
Gusa ngo nubwo bamenye ko bafitanye isano ntacyo bizahungabanya ku rukundo rwabo ahubwo ruzarushaho gukomera.

Umugabo yagize ati “Kuba dufite icyo dupfana ntacyo bizahungabanya ku mibanire yacu, kuko abantu bose bashakanye baba bafite umwihariko wabo kandi batandukanye. Twebwe umubano wacu urahamye ntabwo iki kintu aricyo cyadutandukanya.”


Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE