‘Butt lifter’ na ‘Butt Pads’, ibituburamabuno abakobwa bifashisha mu kureshya abagabo

Yanditswe na Umutoni Rosine
Kuya 23 Ukuboza 2016 saa 06:26
Yasuwe : XX
0

Kuri ubu abakobwa n’abagore baharaye kugura imyambaro y’imbere ituma bagira amabuno manini ku buryo abagabo ndetse n’abandi bose babarangarira.

Iyi myambaro irimo iyitwa “Butt lifter” na “Padded Underwear”.
Butt lifter ni umwambaro w’imbere ufite agashumi gaca mu kibuno,ahandi ikaba iteye nk’ikabutura ariko ifashe cyane. Inyuma ku mabuno hari imyenge amabuno yinjiramo maze uko iyahambira akazamuka akituga maze akabyimba akamera nk’uko igi riteye.

Iyi myambaro igaragaza neza amabuno ku bambaye amakanzu n’amajipo ku buryo babandi bakunda abakobwa bafite amabuno ateye neza batangira gushaka uko baba inshuti.

Butt Pads yo ni umwambaro twawita nk’ikibindo cy’amabuno. Ni utuntu tubiri ufata ukadutsindagira ku mabuno akabyibuha ariko hari nubwo tuba dukoranye n’umwenda.

Ukoze mu buryo iyo umuntu afite utubuno dutoya agira ibibuno binini kandi biteye neza, iyo awambaye.

Ubu bwoko bw’imyenda ngo bukundwa n’abahanzi, abanyamideli n’abandi basobanukiwe n’ibyo kwirimbisha bigezweho.

Iyi myambaro yakozwe ku mpamvu zitandukanye

- Igaragaza neza abayambaye mu buryo bubereye ijisho ku buryo umuntu nawe abona ko byatumye agira imiterere idasanzwe.

- Ituma umuntu yumva yuzuye neza , nta rwicyekwe afite rw’uko ateye nabi ahuhwo agatambuka yemye.

- Yongerera icyizere uyambaye akumva ubwo abantu babonye ko ateye neza n’icyo ari buvuge kiza kumvikana vuba.

- Ifasha abantu birirwa bicaye kubera akazi, abahora bicaye mu tugare kubera ubumuga n’abarwaye umugongo kudahombana amabuno cyangwa ngo bumve barushye kubera ko amabuno yashyushye.

- Ifasha ba mukerarugendo n’abandi batembera ahantu nyaburanga kwirinda ko amahwa yabajomba ku mubiri, kwirinda kurumwa n’imibu, kuba baribwa n’ibikoko bigahita bigera ku mubiri ako kanya.

- Ifasha abanyonga amagare kudakoboka cyangwa kunanirwa vuba;

- Ifasha abamurika imideli kwigarurira abaguzi kuko iyo ubonye umuntu yambaye neza aberewe kugura na we ni nk’ako kanya.

Abakobwa bambara iyi myambaro bagize icyo bavuga

Mu kiganiro gisa n’igisekeje hamwe n’umunyamakuru wa IGIHE abakobwa bamwe bagize icyo bayivugaho.

Umukobwa umwe utemeye ko hatangazwa izina rye, yavuze ko atangira kubona Butt pads yayibonanye abandi bakobwa mu bukwe akumva arayikunze.

Ati “ Hari mu ntangiro za 2015 twatashye ubukwe, nari ndi mu bambariye umugeni.Abakobwa bandi twari kumwe bari bambaye aya makariso ya Butt pads maze mbona baraberewe.Ni njyewe utari uyambaye ariko wasangaga abantu bavuga ngo runaka yambariwe n’abantu bafite amabuno uretse umwe wabayobeyemo.

Numvise bimbabaje ariko nanjye hashize igihe gito ndayigura nkajya nemeza abandi.Gusa bisa nkaho byanyokamye kuko nsigaye numva nta mwenda nakwambara ntayishyizemo.”

Ishimwe w’imyaka 25 we ngo yitabiriye inama muri kimwe mu bihugu byo muri Afurika maze umuntu amubaza ukuntu we adateye neza kandi ari cyo abanyarwandakazi bazwiho maze atashye arayigura.

Ati “Ubusanzwe sinkunda ibintu byo kwihindura ariko kugira ngo ngaragare neza nk’umunyarwandakazi ,’butt lifter’ ndayambara nkihesha ishema.”

Akimpaye we ngo yamenye ko abasore bakunda abakobwa bafite amabuno manini bityo akaba yambara ‘butt pads’ kugira ngo azabashe kubona uwamushaka dore ko bitoroshye kubona umugabo mu gihe ari n’umushomeri.

Ati “Njyewe nakuranye n’abahungu bakambwira ko abasore benshi bakunda umukobwa ufite amabuno manini. Natinze kubona akazi ntangira kuyambara kandi umusore dukundana ambwira ko yishimira uburyo nteye neza.”

Igiciro ku isoko

Igiciro cy’iyi myenda ikunzwe cyane n’abanyabiroli ndetse n’abiyita abasirimu mu kurimba gitandukana bitewe n’aho uyiguze.

Ku mbuga za internet zitandukanye usanga iri hagati y’amadorali arindwi na 40.Mu Rwanda ho abaganiriye na IGIHE bavuze ko igiciro kiri hagati y’ibihumbi 30 na 20 bitewe n’aho icururizwa.

Ibibi byo guhora wambaye iyi myenda

Kwambara iyi myenda ihambira ibice by’umubiri cyane, bitera kudahumeka neza, bikaba byagira ingaruka k’uyambaye.Byangiza ibice by’imyororokere kuko hari imyambaro itorohera ibyo bice namba.Biviramo ba nyira byo ikoronizwa ku buryo adashobora kuva mu nzu atayambaye.

Amabuno se ni ngombwa ngo umukobwa akundwe?

Hari benshi bambara bene iyi myambaro kugira ngo bakundwe n’abasore kubera ikimero kiza ariko si cyo cy’ingenzi mu rukundo.

Urubuga elcrema rugaragaza impamvu eshatu amabuno atari yo ashingirwaho mu gukunda umukobwa, kuko iyo umuntu agukunda by’ukuri agukunda uko uri kose.

Ikindi ni uko ngo umuntu ahora ari mwiza uko yaba ari kose bitewe n’umureba ndetse amabuno manini y’umuntu udafite umutima mwiza cyangwa ubwenge ntacyo amaze kuko ahinduka nk’umutwaro kuri nyirayo.

Iyi myambaro ituma amabuno azamuka ugasanga ateye neza
Iyi myambaro ituma ku bambara amakanzu bigaragara neza kurushaho

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza