Hagiye gufungurwa inzu izava imuzi ibijyanye n’igitsina cy’umugore

Yanditswe na Umutoni Rosine
Kuya 13 Nzeri 2017 saa 07:38
Yasuwe :
1 0

Ibihugu usanga bikora iyo bwabaga mu gushyiraho inzu ndangamurage zihariye ndetse zifite udushya ku buryo zikurura ba mukerarugendo bakinjiriza ibihugu byabo akayabo.

Umwongerezakazi w’imyaka 25 witwa Florence Schechter, yagaragaje igitekerezo kidasanzwe kuko ashaka gutangiza inzu ya mbere ku Isi yagenewe ibijyanye no kuvuga ku gitsina cy’umugore ikazaba iherereye i Londres mu Bwongereza.

Nubwo igitekerezo ataratangira kugishyira mu bikorwa, uyu mukobwa usanzwe ari umuyobozi w’ikigo Collab Lab gikora filime ngufi za siyansi zigashyirwa kuri Youtube, avuga ko umushinga we ari hafi kuwusoza ugahita utangira.

Inkuru dukesha urubuga Top Sante ivuga ko Schechter yemeza ko igitekerezo cyimuteye ishema kandi ko kizashoboka kuko niba hariho inzu ivuga ku bijyanye n’igitsina gabo (musée du pénis) iherereye mu murwa mukuru wa Iceland ariwo Reykjavik ngo nta kabuza ko n’inzu yibanda ku bijyanye n’igitsina cy’umugore nayo yabaho.

Iyi nzu yitwa ‘Vagina museum’ yamaze kugira konti ya Instagram nubwo itaratangira gukora.

Mu mashusho yanyujije kuri Youtube, Schechter urimo kwiga kuri uyu mushinga yagize ati “Nta hantu na hamwe ku Isi haba inzu y’amateka ajyanye n’igitsina cy’umugore Usanga hariho ibishushanyo n’amafoto kuri internet ariko nta hantu hazwi washaka kujya ngo umenye ibijyanye byose n’igitsina cy’umugore .

Avuga ko abagore bazimenya biruseho, bazahishura amabanga yabo n’ubuzima bacamo mu bihe bitandukanye nko kubyara n’ibindi batinya kubaza.

Hazahishurirwa ibifatwa nka kirazira ku gitsina cy’umugore

Azaba ari ahantu hazavugirwa ikintu cyose cyerekeye igitsina gore n’uburyo bigenda ngo umugore yororoke. Iyo nzu izagaragaza umuco ku bivugwa ku gitsina gore n’uburyo bafatwa muri sosiyete zitandukanye ndetse n’amateka y’igitsina cy’umugore.

Izagaragaza uko habaho ubusumbane ku bagore, uko bakorerwa ihohoterwa, uko bamererwa mu gihe cy’imihango n’ibindi byose bivuga ku mu mugore.

Uyu mugore azajya akoresha Youtube mu bukangurambaga bwe ku bakoresha internet mu kubashishikariza gusura iyo nzu ndetse ni nayo ntwaro arimo gukoresha ngo iyo nzu izabe iherereye mu Bwongereza.

Kuba hariho inzu ivuga ku bijyanye n’igitsina cy’umugabo ndetse ikaba isurwa cyane muri Iceland ngo ni icyizere ko niyo y’abagore yari ikenewe.

Mu nzu ibumbatiye byinshi ku gitsina cy’umugabo iba muri Iceland hagaragaramo amoko atandukanye y’imiterere y’igitsina gabo, ibishushanyo by’ubugeni ndetse n’ibindi abantu baba bashaka kumenya ku gitsina gabo. Inzu ivuga ku gitsina cy’abagore nayo niko izaba imeze.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza