Hashtag zaranze umwaka wa 2016 muri Afurika

Yanditswe na Mukaneza M.Ange
Kuya 29 Ukuboza 2016 saa 10:37
Yasuwe :
0 0

Iyo inkuru cyangwa ikibazo kiri kuvugwaho cyane abahurira ku mbuga nkoranyambaga akenshi usanga hashyirwaho ijambo (Hastag) riherekeza ibitekerezo kugira ngo buri wese abashe kubona ibyo abandi bavuze.

Mu 2016, Abanyafurika bifashishije imbuga nkoranyambaga ari benshi mu kugaragaza ibibazo, imyigaragambyo ndetse no kwerekana agahinda batewe n’urupfu rwa bimwe mu byamamare.

BBC yagerageje gukusanya zimwe muri Hashtag zagarutsweho cyane n’abanyafurika ku mbuga nkoranyambaga cyane cyane kuri twitter muri uyu mwaka wa 2016.

#TheOtherRoom

Mu Ukwakira 2016 nibwo Perezida wa Nigeria Muhammadu Buhari yateranye amagambo n’umugore Aisha Buhari. Icyo gihe uyu yari yatangaje ko atazashyigikira umugabo we mu matora ateganyijwe kuba mu 2019, kubera imikorere mibi ya Guverinoma ye.

Mu kumusubiza, Perezida Buhari wari mu ruzinduko mu Budage yakoresheje amagambo asa n’ayatunguye benshi, aho yagize ati” Sinzi ishyaka rya Politiki umugore wanjye abarizwamo, gusa ni uwo mu gikoni cyanjye, mu ruganiriro no cyumba cyanjye (The Other room).”

Hifashishijwe ijambo #TheOtherRoom, abantu batandukanye bagiye bagaragaza ko amagambo ya Buhari ari ikimenyetso cy’uko kuri we umugore nta kindi amaze uretse kuba mu rugo no kwita ku mugabo we.

Nyuma ariko umuvugizi we yaje gusa n’uturisha abakoresha imbuga nkoranyambaga aho yababwiye ko ibyo Perezida Buhari yavuze kwari ugutebya.

#IfAfricaWasASchool

#IfAfricaWasASchool nayo n’indi Hashtag yakoreshejwe cyane n’Abanyafurika ku mbuga nkoranyambaga, nyuma yo gutangizwa n’Umunya-Malawi.

Mu gihe bamwe bayikoresheje bagaragaza uko byaba bimeze Afurika iramutse ari ishuri, uburyo abanyeshuri bakwambara n’ibindi. Hari n’abayifashishije berekana ibibazo uyu mugabane ugifite birimo n’ubukoloni buri mu byatumye udatera imbere.

Uwagaragaje ibi we yavuze ko Afurika iramutse ari ishuri, andi mashuri yaza agatwara ibitabo, abantu bagasigara bibaza impamvu Abanyafurika badasoza amasomo yabo.

#OromoProtests na #AmharaProtests

Andi magambo yagarutsweho cyane ku mbuga nkoranyambaga ni #OromoProtests na #AmharaProtests yakoreshejwe mu myigaragambo y’abaturage bo mu bwoko bwa Oromo na Amhara muri Ethiopia, bavugaga ko basigajwe inyuma muri gahunda z’iterambere.

Nubwo iyi myigaragambyo yatangiye umwaka ushize ariko muri Kanama 2016, nibwo abantu benshi bayivuzeho cyane ubwo Umukinnyi usiganwa ku maguru, Feyisa Lilesa wari mu mikino Olempiki yabereye i Rio de Janeiro muri Brazil yakoze ikimenyetso cyakorwaga n’abaturage bari mu myigaragambyo.

Icyo gihe yavuze ko nubwo kwigaragambya bitemewe mu mikino nk’iyi ahisemo kwifatanya n’abaturage bo mu bwoko bwe bwa Oromo kandi ko benshi muri benewabo bari muri gereza.

Gutinya kugirirwa nabi ageze muri Ethiopia byatumye Lilesa ahita asaba ubuhungiro muri Leta Zunze Ubumwe za Amerika.

#BringBackMutharika

Irindi jambo ryakoreshejwe cyane ni #BringBackMutharika (Mugarure Mutharika), ryatangijwe ubwo Perezida wa Malawi, Peter Mutharika yajyaga mu nama y’Umuryango w’Abibumbye i New York muri Amerika, akamara igihe atarataha.

Abantu benshi bahise batangira gukwirakwiza inkuru z’uko Mutharika w’imyaka 76 yaba yaragezeyo, akarwara bikaba ngombwa ko ajyanwa mu bitaro byo muri Amerika.

Nyuma y’iminsi ijambo #BringBackMutharika ari nako abantu bagenda batanga ibitekerezo byabo ku mpamvu ituma adataha, Leta yaje gushyira hanze itangazo ivuga ko ari muzima, ko hari izindi gahunda akirimo muri Amerika.

Mutharika wari waragiye muri Amerika ku wa 25 Nzeri 2016, yaje kugaruka ku itariki 16 Ukwakira, aho yashimangiye ko ari mutaraga.

#RIPPapaWemba

Ku itariki 24 Mata 2016, nibwo inkuru y’incamugongo yamenyekanye ku bakunzi b’umuziki ko umuhanzi Papa Wemba ukomoka muri Repubulika Iharanira Demokarasi ya Congo yatabarutse.

Bakoresheje ijambo #RIPPapaWemba, abantu batandukanye barimo n’ibyamamare nka Youssou Ndour, Samuel Eto’o, Youssoupha bamuvuze ibigwi ndetse bamwifuriza kuruhuka mu mahoro.

#StopRacismatPretoriaGirlsHigh

Irindi jambo ryagarutsweho cyane ku mbuga nkoranyambaga ni #StopRacismatPretoriaGirlsHigh ryifashishijwe mu kwamagana ivangura ryakorerwaga mu ishuri ry’abakobwa riri mu Mujyi wa Pretoria muri Afurika y’Epfo.

Iri jambo ryatangiye gukoreshwa n’abantu batandukanye nyuma y’uko hagiye ifoto y’umukobwa w’umwirabura wari mu myigaragambyo yamagana abarimu bamusabaga kurambura no kudefiriza imisatsi ye.

#TBJoshua

Iyi Hashtag nayo yakoreshejwe cyane guhera mu Ugushyingo 2016, nyuma y’uko Hillary Clinton atsinzwe amatora ya Perezida wa Leta Zunze Ubumwe za Amerika kandi Umupasiteri ukomeye muri Nigeria, TB Joshua yari yarahanuye ko azatsinda, avuga ko yabonye igihugu cy’igihangange kiyobowe n’umugore.

Abantu benshi bahise batangira gukoresha ijambo #TBJoshua, bagaragaza uburyo abayeho nyuma y’uko ubuhanuzi bwe butabaye impamo. Byarushijeho gukomera ubwo ibyari byatangajwe muri ubu buhanuzi byasibwaga kuri Facebook.

#BidoungChallenge

#BidoungChallenge nayo ni indi Hashtag yagaragaye ku mbuga nkoranyambaga aho abantu bageragezaga kwigana uburyo muri uku kwezi Minisitiri wa Siporo muri Cameroun yasuhuje Perezida Paul Biya, yunamye cyane.

Nyuma y’uko ifoto y’iyi ndamukanyo igiye hanze, abantu benshi bahise batangira kumwigana bashyira hanze amafoto yabo aherekejwe n’ijambo #BidoungChallenge.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza