Ibivugwa ku ikawa ya 50 Frw imaze imyaka 67 ihuruza abasheshe akanguhe n’urubyiruko i Nyamirambo

Yanditswe na Thamimu Hakizimana
Kuya 18 Werurwe 2017 saa 09:38
Yasuwe :
0 0

Uko umujyi urushaho kwaguka niko ubuzima bw’abawutuye buhinduka umunsi ku wundi, gusa mu bice bimwe na bimwe usanga bafite uburyo bw’imibereho ituma bagendana n’ibihe kandi bakicara ahantu hamwe bagasasa inzobe nta kwishishanya.

Nyamirambo ni kamwe mu duce tuvugwa cyane bitewe n’uko abagaturiye bafite umwihariko w’imibereho idaheza buri wese ndetse benshi ntibajijinganya guhamya ko nta handi baharutisha bitewe n’uko ubuzima bwaho bworoshye ndetse nta kintu kitahaboneka.

Ibi babihera ku kuba muri aka gace umuntu witwaje igiceri cy’ijana ashobora kugura ka mushikake, usanga mu bindi bice igurwa n’uwifite, isambaza za 200 Frw, ibishyimbo bitetse by’ijana n’ikawa y’amafaranga 50 n’ibindi.

Kuba Abanyarwanda benshi barimo n’ababa mu mahanga bahora batekereza ku ikawa igura igiceri cya 50 Frw, imaze imyaka igera kuri 67 icurururizwa i Nyamirambo ni kimwe mu byatumye IGIHE isura ikanavugana n’abahatuye; kugira ngo imenye imvo n’imvano yayo.

Umusaza w’imyaka 70 witwa Abdul Atibu uvuka mu Biryogo yemeza ko ikawa yatangiye kunyobwa muri aka gace ahagana mu 1950.

Yagize ati “Batangiye kuyinywa kera kuko nanjye navutse nsanga abasaza bayinywera hano buri gihe iyo babaga barangije akazi kabo.”

Ukutavuga rumwe ku kamaro k’ikawa mu kongera imbaraga z’umugabo mu buriri

Atibu yavuze ko amaze imyaka irenga 25 anywa ikawa ndetse atayinywa kugira ngo imufashe mu gihe cy’imibonano mpuzabitsina ahubwo ayikundira ko ituma adafatwa n’ibitotsi mu buryo bworoshye.

Ati “Ntabwo twe tuyinywa kugira ngo idufashe mu bijyanye n’ibyo gutera akabariro kuko kuva mbere na ba data hano barayihanyweraga.”

Kanani Mussa w’imyaka 50 we yashimangiye ko iyi kawa batangiye kuyinywa, abantu babavumira ku gahera gusa ngo baje gushiduka babona ababasekaga aribo bayoboke bayo b’imena.

Yagize ati “Mbere barabeshyaga ngo tuyishyiramo ibiyobyabwenge ariko ubu nabo basigaye baza tukayisangira kandi babonye ko ari iy’umwimerere. Icyo ntemera ni abavuga ngo tuyinywa kugira ngo idutere imbaraga kuko hari n’ababa bifitiye imbaraga zabo karemano ku buryo bashobora kuyinywa ntigire icyo ibafasha.”

Yakomeje agira ati “Njye nk’umushoferi ikawa nyikundira ko nshobora gutwara imodoka ijoro ryose simfatwe n’ibitotsi na bike ariko sinyinywa kugira ngo impe izindi mbaraga nk’uko njya numva abatayizi bayivuga.”

Gusa nubwo aba basaza bavuga imyato iyi kawa ko ibafasha mu kazi kabo hari n’urubyiruko ruvuga ko ruyinywa iyo rufite gahunda yo guhura n’abakunzi babo.

Umumotari witwa Muhizi Antoine yagize ati “Nibyo ituma umuntu adafatwa n’ibitotsi ariko ntibazakubeshye inongera imbaraga kuko iyo wayinyweye uba ufite impambara, gusa abantu bayinywa n’abayiteka ntibakunda kubyemera.”

Kuva mu myaka yo hambere, Nyamirambo yubatse izina ku ikawa ihuruza abatari bake kuko nta mugoroba w’ubusa usanga ku bicumbi by’aho icururizwa haba hasendereye abantu baturutse mu bice bitandukanye by’Umujyi wa Kigali bashaka gusogongera ku buryohe bwayo.

Abasaza banywanye n'ikawa y'amafaranga 50 icuruzwa i Nyamirambo bemeza ko ibafasha kudatwarwa n'ibitotsi iyo bari mu kazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza